Helgestenging i Fløyfjelltunnelen sørgåande løp 8.-11. mai

Arbeidet fører til redusert framkome i perioden, frå fredag 8. mai til måndag 11. mai.

Naudsynt arbeid for auka tunnelsikkerheit

Statens vegvesen skal etablere brannsikker straumforsyning til naudutrusting og ventilasjon i Fløyfjelltunnelen. Vi skal grave over vegen i tunnelen for kabelkryssing, dette er eit viktig tiltak for å sikre at kritiske funksjonar fungerer som dei skal ved brann eller andre alvorlege hendingar.

Arbeidet går føre seg frå klokka 17.00 fredag 8. mai til klokka 05.30 måndag 11. mai.

Den relativt lange stengjeperioden er naudsynt fordi arbeidet omfattar sprengingsarbeid, reetablering av bærelaget i betong i tunnelen og etterfølgjande asfaltering etter at betongen har herda. Sprenginga tek tid og stiller strenge krav til tryggleik, og både herding av betong og asfaltering krev samanhengande arbeidstid før tunnelen kan opnast for ordinær trafikk att. Arbeidet let seg difor ikkje gjennomføre med korte nattestengingar.

– Det finst ikkje noko tidspunkt som passar godt for å stengje ein så viktig tunnel. Dette tidspunktet er valt fordi det er vurdert som mindre dårleg enn alternativa, samstundes som arbeidet kan gjennomførast på ein trygg og fagleg forsvarleg måte, seier seksjonsjef Jørn Kristian Engebø i Statens vegvesen.

Slik vert trafikken påverka

Sørgåande løp i Fløyfjelltunnelen, mot Bergen sentrum, blir stengt i heile arbeidsperioden.

Nordgåande løp på E39 (frå Bergen sentrum mot Åsane) er ope for trafikk i heile perioden.

Det vil berre vere korte, mellombelse stansar natt til laurdag i samband med sprengingsarbeid.

All trafikk frå nord som skal mot Bergen sentrum eller søndre bydelar bør nytte fv. 587 Hardangervegen (Grimesvingane).

Dette er hovudomkøyringsruta og den klart mest hensiktsmessige løysinga.

Omkøyring via Sandviken og Bryggen er frårådd. Trafikk gjennom fv. 577 Sandviksveien og over Bryggen vil gi store køar og lang ventetid.

I sentrale delar av Bergen sentrum og i viktige knutepunkt på Hardangerveien (Grimesvingane) blir det sett inn trafikkvakter som manuelt styrer trafikken i dei mest belasta kryssa og knutepunkta.

– Det kjem til å bli kø. La bilen stå

Statens vegvesen oppmodar folk sterkt til å nytte kollektivtransport ved reiser i og rundt Bergen sentrum denne helga. Biltrafikk vil i store delar av perioden føre til uføreseieleg framkome og lang ventetid.

Oppdatert trafikkinformasjon finst på 175.no og i appen Vegvesen trafikk.

Dialog og beredskap

Statens vegvesen har tett dialog med utførande entreprenør, nødetatane og kollektivaktørane for å handtere trafikale konsekvensar og sikre naudsynt beredskap medan arbeidet pågår.

– Vi beklagar ulempene tiltaket får for trafikantane våre men ber om forståelse for at arbeidet er nødvendig for å sikre ein trygg og sikker tunnel også i framtida.

– Vi har og registert gladnyheita om at Brann har gått videre til cupfinalen i Oslo. Vi har initiert dialog med Bergen kommune og vil innlemme tiltak på omkjøringsvegen i Bergen sentrum laurdag kveld i våre planar,  seier Engebø.