Premieredatoen klar for «Tuva & Ronny – eit lite hotell i Hellas»

• Premiere måndag 20. april i NRK TV og på NRK1
  

I serien «Tuva & Ronny – eit lite hotell i Hellas» følger vi ekteparet Tuva Fellman og Ronny Brede Aase når dei satsar alt på draumen om å kjøpe, pusse opp og drive eit lite hotell i landet dei elskar: Hellas.

– Det å kaste om på alt ein har for å følge draumen, det er ei heilt sinnssjuk kjensle. Det er topp tre kjensler i livet, dette her. Etter å få barn og gifte seg, seier Tuva entusiastisk.

Ekteparet både gleder og gruer seg til å vise fram serien.

– Han viser eit ekte og usminka bilde av livet vårt og vår reise. Eg har ikkje vore med på noko som slepper folk så nært inn, seier Ronny.

Første titt på serien

Det blir totalt tolv episodar i serien, med to episodar i veka (måndag og onsdag). Allereie i første episode blir det både stor entusiasme og nokre smellar.

Her er første klipp fra serien.

Ekteparet ler og seier følgande om utdraget:

– Dette blir berre ein av mange opp- og nedturar for Tuva Fellman og meg sjølv i denne serien, seier Ronny.

– Vi er to ekstremt naive personar med enorm og ugrunna tru på at alt går bra til slutt. Folk seier det er vanskeleg å starte eit hotell i Hellas, men vi tenker liksom «men VI får det jo til!». Dette året har kanskje rokka litt ved tanken om at alt ordnar seg, seier Tuva.

For utfordringane står i kø: Meklarar som ikkje møter opp, falleferdige rønner, budsjett som sprekk frå start og eit gresk byråkrati som slår dei i bakken. Heldigvis stiller både venner og familie opp.

Vendepunktet

Paret har heilt sidan starten av forholdet drøymt om å starte sitt eige vesle hotell. Og det måtte bli i Hellas. Her hadde dei sin første kjærastetur, bryllaupsreisa og mange fleire ferieturar.

Tuva og Ronny bestemte seg for å følge draumen etter å ha kjent kor skjørt livet kan vere.

I 2021 fekk Tuva påvist forstadium til brystkreft og ho fjerna eit bryst. I 2023, mens ho var gravid med det yngste barnet til paret, fekk ho tilbakefall. No etter behandlinga er over, har dei eit nytt perspektiv på livet der dei kastar seg ut i eventyret.

– Det blir hardt, røft, vakkert og fantastisk. I sum litt sånn livet er, samanfattar paret.

«Tuva & Ronny – eit lite hotell i Hellas» er ein rå, varm, ekte og rørande serie om å starte på nytt etter den hardaste kampen i livet. Alt med idylliske og vakre Hellas som ramme.

--------------------------------

OM SERIEN

• Premiere 20. april 2026
• 12 episodar på ca. 20-35 minutt
• To episodar i veka, måndagar og onsdagar
• Blir produsert av Fenomen
• Produsentar i Fenomen: Tom Marius Kittilsen og Karina Lystad
• Eksekutiv produsent i NRK: Marie Sjo
• Pressekontakt: Ingrid Kvitrud
• Publikum kan kontakte Publikumsservice/230447000