Slik blir NM i bruk av gjetarhund når det kommer til Etne

Det er Gjetarhundnemnda i Hordaland Sau og Geit og Haugaland Gjetarhundnemnd som har stått bak søknaden og det innleiande planleggingsarbeidet. No er ei eiga hovudkomité og ein lokal arrangementkomité på plass, og førebuingane er godt i gang.

– Vi er stolte over å få dette til i Etne, og dugnadsgjengen er allereie i full sving, seier Audun Seilen som er en av arrangørane bak.

Kjend arena for gjetarhundfolket

NM skal haldast på same stad som finalen i Norgesserien i 2023, ein gard som tidlegare husa vidaregåande skule, og som no er i drift med både kjøt- og mjølkeproduksjon. Bana er open og oversiktleg, noko som gjer det lett å følgje med for både deltakarar og tilskodarar.

Det blir sett opp eit telt med god utsikt over arenaen, kiosk og servering. Parkering blir lagt til området like ovanfor. For dei som ikkje kan møte opp, blir det livestreaming etter same opplegg som dei siste åra, og ein erfaren speaker vil forklare og kommentere prøvane undervegs.

Stort nedslagsfelt

Haugaland Gjetarhundnemnd dekkjer søre del av Hordaland og nordre del av Rogaland, og heile 14 lokallag i Norsk Sau og Geit er tilknytt nemnda. Regionen er kjend for eit aktivt gjetarhundmiljø, og arrangørane har både erfaring og kapasitet til å ta imot deltakarar og gjester frå heile landet.

Til NM blir det brukt om lag 150 dyr, krysningsau av villsau og pelssau. Sauen er godt handtert og van med prøver, og blir fortløpande køyrd tilbake og blanda inn att gjennom helga.

Overnatting og festmiddag

Etne og omland har fleire overnattingstilbod: Fugl Fønix hotell, Etne Camping og Kyrping Camping tek imot dei som kjem langvegsfrå.

Fredag kveld, rett etter at prøvane for dagen er ferdige, blir det NM-møte i teltet på arenaen. Festmiddagen blir halden på Skakkatunet i Etne, eit triveleg forsamlingslokale med god plass og god stemning.

Dommarar og oppmann blir annonserte så snart namna er klare.

Ei god moglegheit for lokalsamfunnet

NM i bruk av gjetarhund trekkjer kvart år deltakarar, familiar og entusiastar frå heile landet. For Etne er dette ein god sjanse til å vise fram bygda, både som arrangør og som reisemål. Planlegginga er godt i gang, og arrangørane er klare på at dei vil levere eit meisterskap som både deltakarar og publikum vil hugse.

No er det berre å håpe at vestlandsvêret speler på lag.

-Alle, både tilskodarar, deltakarar, dommarar, og frivillige, er alle hjarteleg velkomne til Etne 9.–11. oktober 2026, avslutter Audun.