Lagabui 46 miljovnna mediadoarjagis sámi gillii ja kultuvrii

Doarjjaortnet lea oaivvilduvvon aviissaide mat láhčet demokráhtalaš digaštallama ja oaiviliid hábmema sámi servodagas ja galgá movttiidahttit viiddis journalisttalaš sisdoalu buvttadeami mii lea dárkkuhuvvon sámi álbmogii, lassin dasa ahte ovddidit sámi gielaid ovdáneami.

– Mediat main lea sámi álbmot váldoulbmiljoavkun sáhttet ohcat buvttadandoarjaga ortnega olis. Eará almmuhusat sáhttet ohcat doarjaga fásta ja jeavddalaččat almmuhit nummiriid sámegielaide, lohká ossodatdirektevra Hanne Sekkelsten Norgga Mediabearráigeahčus.

Oktiibuot doarjja dán jagi lea 45.970.000 ruvnno.

Ohcanáigemearri lea cuoŋománu 30. beaivvi 2026.

Ođđa njuolggadusat dán jagáš ohcciide

Ođđajagemánu 1. beaivvi 2026 rájes lea ođđa njuolggadus mii regulere doarjaga.

– Ortnet lea dál lávdeneutrála, ja lea buorebut heivehuvvon digitála árgabeaivái dan dáfus ahte gaskaoapmi sáhttá leat mielde seailluheamen ja ovddideamen sámi gielaid maiddái digitálalaččat, lohká Sekkelsten.

Ođđa njuolggadusain leat eanet sullasašvuođat «Ođas- ja áigeguovdilis mediaid buvttadandoarjagiid njuolggadusain» go ovddit njuolggadusain, ja sisttisdollet gáibádusaid earret eará iešbuvttaduvvon muitalusaide, abonnemeantaloguide ja redakšuvdnabargojahkái.

Doarjja juhkkojuvvo ain buvttadandoarjagii ja doarjagii ovttaskas muitalusaide sámegillii.

Eanet sámegielat leat mielde ortnegis

Go galgá addit movttiidahttima eanet muitalusaide sámegillii, de rahpá ođđa njuolggadus doarjagiid eanet sámi gielaide go dat mat leat mielde boares ortnegis. Ovdal sáhtte julev- dahje lullisámegillii čállojuvvon aviisasiiddut oažžut doarjaga iešbuvttaduvvon materiálii.

– Jagi 2026 rájes galgá maid davvisámegiella, bihtánsámegiella, ubmesámegiella ja nuortasámegiella/ nuortalašgiella mielde ortnegii. Ovttaskas mediat ožžot doarjaga mii rehkenastojuvvo sámi áššiid oasi vuođul buot áššiin maŋimuš kaleanddarjagis ovdal doarjjajagi, dadjá Sekkelsten.

Doarjagat áššiide sámegielain  sáhttet leat oktiibuot gitta gávcci proseantta juolludeamis ovttaskas jagi ovddas, lassáneapmi ovddit njuolggadusa ektui gos rádji lei gitta njeallje proseantta rádjai.

Buvttadandoarjja boahtá ain leat stuorámus oassi doarjagis.

Ođđa ortnegis earuhit allafrekveanssa ja vuollegašfrekveanssa ođas- ja áigeguovdilis mediaid. Guđe doarjjajovkui sierra media gullá, mearriduvvo abonnemeantaloguin, iešbuvttaduvvon áššiid logu mielde jagis ja vahkus, ja redakšuvnnalaš jahkedoaimmain. Vuođđodoarjaga ja rievddadeaddji doarjaga árvvoštallan lea maid earálágan alla- ja vuollegašfrekveanssa doarjjajoavkkuid gaskkas.

Ruhtadeapmi juolluduvvo 2026 čavčča áigge.

Ávkkálaš liŋkkat:

Kultur- ja dásseárvoministeriija preassadieđáhus ođđa njuolggadusaid birra
Ođđa njuolggadusat doarjaga birra sámi ođas- ja áigeguovdilis mediaide
Mediabearráigeahču neahttasiidu mas leat dieđut ja rávvagat ortnega birra