E134 Etne: Vegen vert tidlegast opna neste veke

– Det er eit omfattande og krevjande arbeid som må gjerast før me kan opna E134 for trafikk att, seier Svenn Egil Finden, avdelingsdirektør i Statens vegvesen.

Komplisert arbeid

Sidan skredet gjekk på søndag, har geologar vore til stades for å kartlegga risiko i fjellområdet. Losneområdet ligg 400 høgdemeter over havet i ei bratt fjellside, og det har vore krevjande å etablera tilkomst ned til losneområdet.

– Geologane våre har fått 3D-skanna skredområdet og fått laga 3D-modellar som me brukar i vurderingane våre. Me har òg hatt taulag oppe i fjellet, fortel Finden.

Finden skildrar arbeidet som komplisert.

– Dette er ein komplisert arbeidsoperasjon. Sikkerheita er det viktigaste, både for dei som jobbar i området og for vurderingane av tryggleiken for vegen og bebuarar i framtida.

Geologane har kartlagt fjellet og me ser det naudsynt å ta ned nokre usikra parti på staden.

– Dette for å tryggja trafikantane som ferdast på E134 og lokalmiljøet, seier avdelingsdirektøren.

Liv og helse er det viktigaste

Skredet som gjekk i Fjæra på E134 er eit stort skred, også i vestnorsk målestokk. Dette medfører at vegen vert stengd i fleire dagar. Det går ut over både trafikantar og næring. At vegen er stengt er sjølvsagt uheldig, men sikkerheita under oppryddingsarbeidet er no det viktigaste.

– Me har diskutert ulike løysingar og av omsyn til tryggleik har me konkludert med at dette er den beste løysinga. Me har stor forståing for ulempene dette fører med seg, men eg vil òg forsikra alle om at me jobbar på spreng for å opna vegen så snart det er mogleg, seier Finden.

Arbeidet med fjellreinsk og sikring av fjellet held fram. Sidan noko meir fjell må fjernast, kan det vera fare for at infrastruktur, som vatn, straum og avløp vert påverka lokalt.

– Me gjer det me kan for å unngå det, men liv og helse er det viktigaste. Me kan ikkje sikra materielle verdiar med menneskeliv som risiko.  

Medan E134 ved Fjæra er stengd, er rv. 13 omkøyringsveg.