Herborg Kråkevik og Nasjonalmuseet lanserer praktboka "Vi vandrar saman. Gjennom song og bilete"

Onsdag 4. mars blir det konsert med Herborg Kråkevik og TrondheimSolistene i Nasjonalmuseet. Konserten markerer lanseringa av både albumet og songboka «Vi vandrar saman».  

- Det er eit kjært og livslangt arbeid for meg, å tørka støv av gamle skattar og gje dei nytt liv, seier Herborg Kråkevik.

Samarbeidet med Nasjonalmuseet er ei vidareføring av det arbeidet ho starta då ho gav ut Kråkeviks songbok i år 2000. “Aldri har vel den norske songskatten blitt tolka på ein finare måte” skreiv Spelemannjuryen og utnemnde ho til Årets Spellemann.  

«Vi vandrar saman» er ei praktbok med kjente norske måleri, sett saman med songtekstar og notar. Den viser den norske kulturarven på nytt og personleg vis. Boka er utgitt som eit samarbeid mellom Samlaget og Nasjonalmuseet.

Onsdag 4. mars er det lansering og konsert i Nasjonalmuseet.

- Det er inspirerande at ein av våre mest folkekjære artistar igjen omfamnar norsk kulturarv på sin personlege måte. Det gir nye perspektiver til både kunst og musikk, som mange allereie har eit nært forhold til, seier Ingrid Røynesdal, direktør ved Nasjonalmuseet.
- Vi jobbar alltid for at kunst generelt skal vere aktuelt på så mange arenaer som mogleg. At Nasjonalmuseet, Samlaget og Herborg Kråkevik går saman om dette prosjektet er noko vi set høgt. 

Håkon Kolmannskog, forlagssjef i Samlaget legg vekt på fellesskapet i Kråkeviks formidlingsprosjekt. 

- I ei tid prega av uro og polarisering treng vi prosjekt som dette – som knyter oss til kunst- og kulturhistoria vår, og som minner oss om krafta i songen, i fellesskapet og i forteljingane våre.

Det eldste måleriet i boka er Fra Stalheim frå 1849 av I.C.Dahl og det nyaste er Marianne Heske sitt Prosjekt Gjerdeløa frå 1980-81. Songane har eit endå større spenn, frå mellomalderballaden Jeg lagde meg så silde til Vamp-songen Liten fuggel frå 2012. Bilde og song vert knytte saman av tekstar skrivne av Herborg Kråkevik. 

«Vi vandrar saman» er for alle som set pris på dei norske song- og kunstskattane. Alle songane er utstyrte med notar.

Albumet er utgitt av Herborg Kråkevik og TrondheimSolistene. 

Under konserten i Nasjonalmuseet, omgjev Trondheimsolistene Herborg sine gamle songar med moderne arrangement skrivne av Tormod Tvete Vik, Helge Lilletvedt, Tove Kragset og Kjetil Bjerkestrand.

Herborg Kråkevik (f. 1973) er sjeldan allsidig som songar, skodespelar og tekstforfattar, og ho har gjennom fleire tiår halde på posisjonen sin som ein av landets fremste kulturformidlarar. 

Ho vaks opp i Jondal og bur no i Viborg i Danmark. Ho fornya sjangeren og skapte ein ny æra for dei litterære julehefta da ho relanserte Juleroser i 2015. I tillegg til å vere redaktør for Juleroser er ho skodespelar, tekstforfattar, komikar og artist med fleire plateutgivingar, filmar, teater, musikalar og show på samvitet.