BAUTA Group er Vestlandet si mest handlekraftige bedrift

– For å vise handlekraft trengst både vilje og evne. Vinnaren viser mot til å investere langsiktig, byggje industri i Noreg og ta ansvar for folka og lokalsamfunna dei er del av. Gratulerer til BAUTA Group, som no kan kalle seg Vestlandet si mest handlekraftige bedrift, sa Jaffery då ho delte ut prisen.

Prisen blir delt ut i eit år der Vestlandskonferansen set søkjelys på samarbeid og nye alliansar i ei uroleg verd – og på behovet for handlekraft i norsk næringsliv.

På litt over ti år har BAUTA Group bygd opp eit familieeigd industrikonsern med base i Tomrefjord i Møre og Romsdal, over 600 tilsette, 20 verksemder og aktivitet langs store delar av kysten.

– Dette betyr svært mykje for oss. Prisen er først og fremst ei anerkjenning av alle dei dyktige kollegaene våre som kvar dag gjer ein fantastisk innsats. Han viser at det er fullt mogleg å byggje konkurransedyktig industri i Noreg. Vi går på jobb kvar dag for å skape arbeidsplassar og bidra til verdiskaping i distrikta – og det er ekstra gledeleg å kunne skru på lyset att i tidlegare nedlagde industribygg. Dette er noko vi vil halde fram med, seier Gjermund Kvernmo Langset, Chief Development Officer i BAUTA Group.

Nær 4 000 publikumsstemmer kom inn til kåringa. Dei nominerte bedriftene blir peika ut av næringslivsforeiningane på Vestlandet, og publikum stemmer fram vinnaren.

Finalistane til Handlekraftprisen 2026 var:

• PSW Power & Automation på Ågotnes, som gjer kraftsystem meir effektive, reduserer utslepp og flyttar energi dit ho trengst.
• Årdal Aqua, som på kort tid har etablert eit av verdas mest avanserte landbaserte oppdrettsanlegg for laks.
• BAUTA Group frå Tomrefjord, som byggjer industri langs kysten, tek i bruk tidlegare verft og utviklar nye løysingar for oppdrettsnæringa.

– Vi treng meir enn nokon gong bedrifter og tilsette som viser handlekraft og finn nye vegar og betre løysingar. Årets finalistar er gode døme på nettopp dette, sa Jaffery.