Arian Engebø leier P3 Live – ny musikksatsing i NRK

P3 Live er eit sjangeroverskridande musikkprogram for alle som elskar musikk. Kvar veke byr programleiar Arian Engebø på intimkonsertar, samtalar og musikkjournalistikk med nærleik til artistane.

Programmet har premiere i dag i NRK Radio og blir sendt på P3 Musikk måndag til torsdag frå klokka 14.00 til 17.00.

– Eg håper publikum oppdagar nye artistar, band og sjangrar dei ikkje visste at dei elska, og at vi klarer å lage augeblikk som får dei til å føle noko gjennom radioen, seier programleiar Arian Engebø.

Nye musikkopplevingar kvar veke – på radio, nett og TV
Kvar tysdag inviterer P3 Live artistar og band inn i NRKs musikkstudio. Artistane framfører éin eigen låt og éin coverlåt, med oppgåva «ein låt eg skulle ønske var min eigen». Dette gir høve til å vise fram musikalsk kvalitet på tvers av sjangrar og stilar, og samstundes skape unik, ny musikk som står på eigne bein.

Konsertane går direkte på radio og blir filma samstundes. Klipp frå både låtar og intervju blir publiserte i NRKs apper og på sosiale medium.

Musikkjournalistikk med breidde og nærleik
P3 Live kombinerer liveformatet med musikkjournalistikk, dokumentarisk forteljing og dagleg underhaldning. Programmet vil ha jamleg besøk av artistar, produsentar, ekspertar og musikkelskarar, og dele ut konsertbillettar til lyttarane dagleg.

– Dette er ei langsiktig og tydeleg satsing på musikk i NRK. P3 Live er éin del av eit større arbeid for å gi publikum meir musikkinnhald, fleire liveopplevingar og sterkare musikkformidling på tvers av plattformer, seier musikksjef Mats Borch Bugge.