Villreinarbeidet blir styrkt med nye stillingar

 – Eg er veldig glad for at vi har fått på plass desse stillingane. Det er eit stort behov for å nå ut med informasjon til besøkjande i desse sårbare områda. Med dette gjer vi eit skikkeleg løft for både villrein og verneområde, seier klima- og miljøminister Andreas Bjelland Eriksen.

– Dei ti som no blir tilsette for å styrkje arbeidet med å ta vare på villreinen har ein svært viktig jobb framfor seg. Dei siste bestandane av villrein i Europa lever i Noreg. Vi har derfor eit spesielt ansvar for å vareta villreinen og deira leveområde, seier Hilde Singsaas, direktør for Miljødirektoratet.

Ti nye faste stillingar

Ti nye statlege stillingar skal opprettast. Fire av stillingane skal styrkje arbeidet til statsforvaltarane med å gjennomføre tiltaksplanar etter kvalitetsnorma for villrein. Stillingane blir etablerte hos statsforvaltarane i Trøndelag, Innlandet, Agder og Østfold, Buskerud, Oslo og Akershus.

Desse fire skal jobbe med gjennomføringa av dei tre vedtekne tiltaksplanane for villreinområda Knutshø, Snøhetta og Rondane, og dei kommande tiltaksplanane for Hardangervidda og Setesdal/Ryfylkeheiene.

I tillegg opprettar ein seks stillingar som skal jobbe spesielt med informasjon om ferdsel i villreinområde og verneområde med mykje ferdsel. Desse stillingane skal knytast til eitt eller fleire verneområdestyre.

– Vi har naturområde som opplever svært mykje besøk, slik som Lofoten og Jærkysten. Der vil vi no kunne gi god og tilrettelagd informasjon til dei besøkjande, til det beste for naturen og dei som bur der, seier Singsaas.

Dei seks stillingane vil bli lokaliserte følgjande stader:

• Hjerkinn
• Skinnarbu
• Stavanger
• Geilo
• Aurland
• Reine i Lofoten

Område som har spesielt behov for god og tydeleg lokal informasjon og rettleiing for besøkjande og reiselivet er prioritert. Informasjonen skal bidra til at besøkjande er godt førebudde og gjer gode vurderingar, og at dei får god informasjon medan dei er i verneområda. 

Dei nye medarbeidarane i villreinområda skal også bidra aktivt til å gjennomføre informasjons- og rettleiingstiltaka i tiltaksplanane for villrein.

Statsforvaltaren får ansvar for å lyse ut stillingane og tilsetje dei nye medarbeidarane.

Fakta: Tiltaksplanar for villrein

Miljødirektoratet er ansvarleg for oppfølginga av Meld. St. 18 (2023-2024) Ein forbetra tilstand for villrein. Hausten 2025 vart dei første tiltaksplanane for villreinen i Knutshø, Snøhetta og Rondane vedteke. På sikt skal alle dei 24 villreinområda ha tiltaksplanar.

Målet er å stanse den negative utviklinga for villreinområda innan 2030, oppnå minimum middels kvalitet for villreinområda innan 2050 og god kvalitet for alle nasjonale villreinområde innan 2100.

Sjå tiltaksplanane: Tiltaksplanar | Villrein

Les meir om villrein i Noreg: Villrein i Noreg - miljodirektoratet.no