Eika med mobil app på nynorsk

- Dette er gode nyheiter for alle kundane våre som har nynorsk som hovudmål. Nynorske versjonar har vore etterspurte av mange kundar og vi er derfor svært stolte av å vere ein av dei fyrste bankane i Noreg som tilbyr kundane våre val av målform i mobilbanken, seier Informasjonsdirektør Sigurd Ulven.  - Vi er ein allianse av lokalbankar med fokus på omsorgsfull kundebetening og nærleik til kundane. Då er også val av målform naturleg å tilby kundane, påpeikar Ulven.

Eika Gruppen utviklar og leverer tenester til nær 80 lokalbankar i Noreg, der ei av desse tenestene er appen «Lokalbanken i lomma». Alliansebankane i Eika har tilpassa denne med sin eigen profil og kundane kan frå 25. april ha valfri målform. Utviklinga av appen på nynorsk har vore eit dugnadsprosjekt mellom Eika Gruppen og alliansebankane i Eika. Kundane sin bruk av mobilbank-appen har teke av etter at den blei lansert for om lag eitt år sidan.

- Alliansebankane i Eika-bankane har meir enn 45 000 kundar som bruker mobilbank-appen dagleg. Enkel bruk og praktiske funksjonar for kunden har vore heilt avgjerande for suksessen, fortel Ulven.  - Vi ønskjer å vareta nærleik til kunden også i dei digitale kanalane. Då er det heilt naturleg at kundane også kan velje målform. I løpet av året vil vi derfor også lansere ein nynorsk versjon av nettbanken og heimesidene våre. Det viser at vi tek nærleik på alvor, avsluttar Informasjonsdirektøren.

Fakta om Eika mobilbank

• 82 forskjellige app'er
• 25 % av alle nettbankbrukarar bruker app.
• 120 000 unike brukarar
• 3-500 nye brukarar kvar dag
• 45 000 unike brukarar som nyttar appen kvar dag
• Kundane i alliansebankane bruker appen ca. 3-4 gonger i veka. Det er den høgaste bruksfrekvensen på mobilbank i Noreg.
• Mest brukte teneste: «sjekk saldo»