Nytt K.G.Jebsen senter i Bergen skal løyse genetiske gåter

Stiftinga K.G.Jebsen støttar det nye senteret for medisinsk forsking i Bergen med 25 millioner kroner. Senteret vil bli etablert i juli 2026 og er finansiert i omlag fem år framover.

Senteret skal forske på genendringar som oppstår på tidlige fosterstadier, og korleis desse påverkar risiko for kreft i vaksenlivet. Senteret er basert på eit nylig gjennombrot; forskarane i Bergen har funne at nesten 10% av friske kvinner har nokre få celler i kroppen der det såkalla BRCA1 genet er feil-regulert og slått permanent av. Feilreguleringa oppstår trulig allereie i løpet av dei første vekene i fosterlivet.

Dei som har slike celler, har auka risiko for bryst- og eggstokkreft i vaksenlivet. Så mange som 20% av dei mest aggressive tilfellene av brystkreft ser ut til å ha oppstått på grunn av slike celler som er feilregulerte frå fosterlivet. Funnet har gitt ein heilt ny måte å sjå kreftrisiko og kreftutvikling på.

Senteret som no vert etablert har to hovudmål: Det eine målet er å finne ut kvifor og korleis slik feilregulering oppstår. Det andre er å finne ut om tilsvarande feil kan skje i andre gen, og dermed gje risiko for andre kreftformer. Noko av det første som skal undersøkast er eit gen som kan gi risiko for både tarm-og livmorkreft.

Forskingssenteret vert leia av professorane Stian Knappskog, Camilla Krakstad og Halfdan Sørbye, og utgår frå Klinisk institutt 2 ved Universitetet i Bergen, og Kreftklinikken og Kvinneklinikken ved Haukeland universitessjukehus.

– Gjennom dette nye K.G. Jebsen-senteret bidrar Knappskog og hans dyktige team til forskning som kan endre hvordan vi forstår, forebygger og behandler kreft. Dette er nettopp den typen banebrytende kunnskap stiftelsen ønsker å fremme, sier daglig leder i Stiftelsen Kristian Gerhard Jebsen Nicholas Nunn.