NVE gjev BKK løyve til ny kraftleidning i Gulen

– Kraftleidninga og den nye transformatorstasjonen vil auke kapasiteten i regionalnettet, og gjere det mogleg å forsyne Skipavika Næringspark med meir kraft, seier Ingrid Myrtveit, seksjonssjef i NVE. 

BKK sin kraftleidning mellom Sandøy transformatorstasjon og nye Raunholmen transformatorstasjon blir om lag to kilometer lang. Leidninga er på 132 kilovolt (kV), og skal i stor grad byggast i same trase som den eksisterande leidninga på 22 kilovolt.  Den nye transformatorstasjonen på Raunholmen dekker 1400 m2 på ei industritomt i nærleiken av Skipavika. Sjølve stasjonsbygget er planlagd med to etasjar, ei grunnflate på 680 m2 og ei høgde opp til ti meter. 

Skal ta omsyn til natur og miljø 

– I denne saka har BKK hatt dialog med Statsforvaltaren i Vestland og kome fram til gode løysingar for sårbare fugleartar, beitande dyr og den utvalde naturtypen kystlynghei. Det gjer at ulempene for miljø og samfunn kan dempast og tiltaka får færre negative verknadar, seier Myrtveit. 

Det handlar mellom anna om korleis støyande anleggstrafikk med helikopter skal haldast utanom hekkeperioden for fuglar og ikkje for nære buskap på beite.  

NVE har og sett vilkår om at BKK lagar ein detaljplan for anleggsfasen der dei beskriver korleis dei skal ivareta omsyn til natur og miljø. 

Planar om ammoniakkfabrikk 

NVE gjev også anleggskonsesjon til SkiGa AS for nettanlegg ved Skipavika Næringspark samt nettilknyting til nye Raunholmen transformatorstasjon. SkiGa har planar om å etablere ein ammoniakkfabrikk i Skipavika næringsområde med eit forbruk opp mot 260 megawatt (MW) på sikt. For å forsyne fabrikken med kraft må det etablerast ein ny transformatorstasjon inne på industriområdet , og eigen 132 kV jordkabel på om lag 100 meter til Raunholmen transformatorstasjon.