Forsvarsbygg tildeler ny rammeavtale for strategisk EBA-rådgiving

Eigedom, bygg og anlegg (EBA) er ein sentral innsatsfaktor i forsvaret av Noreg. Forsvarsbygg har derfor ei sentral rolle i langtidsplanen til forsvarssektoren, Forsvarsløftet. Det er avgjerande at Forsvarsbygg planlegg, utviklar og forvaltar forsvarssektorens EBA på best mogleg måte.
 
Rammeavtalen skal nyttast inn i arbeid med heilskapleg og kontinuerleg langtidsplanlegging av EBA, under dette mellom anna arbeid med strukturutviklingsplanar, perspektivplanutgreiingar og Forsvarsbyggs prosjektportefølje.

Kostnadseffektive og berekraftige EBA-løysingar for Forsvaret

– Ein av Forsvarsbyggs viktigaste målsetjingar er at vi skal tilby Forsvaret kostnadseffektive og berekraftige løysingar som står seg over tid. Dette skal vi vareta ved at forsvarssektorens EBA over heile landet skal vere ein del av ein heilskapleg oppdatert plan. Planen skal vere eit godt grunnlag for å ta avgjerder og han skal sikre ei medvite langsiktig utviklingsretning for EBA i sektoren. Rammeavtalen for strategisk EBA-rådgiving vil vere eit viktig verktøy inn i dette arbeidet, seier fagdirektør plan og analyse, Haakon Øberg.
 
Avtalen har ei totalramme på 275 millionar kroner. Karensfrist går til 22. desember og kontrakt vil bli signert etter det.