Noreg styrker mottakskapasiteten for allierte styrkar

Dette er heilt ny infrastruktur for NATO-samarbeidet, og lagrings-området (staging-area) er på vel 105.000 kvadratmeter, eller ca 20 fotballbanar.

Strategisk satsing for NATO-forpliktingar

Elvegårdsmoen skal vere møteplassen for mannskap og utstyr som blir frakta inn enten til Narvik, Bogen, Ramsund, eller med fly til Evenes. Her møtest utstyr og personell før det føres vidare til dei allierte leirane i Midt-Troms, Akkasæter, Bardufoss og Setermoen. Etter lagring i Bjerkvik kan utstyret også fraktast vidare aust over til dei nye natolanda Sverige og Finland.

Sterkare saman

– Forsvarsbygg skal støtte opp under Forsvaret og forbundsfellane våre i fred, krise og krig. Dette området er heilt avgjerande for at Noreg kan levere på NATO-forpliktingane sine. Vi bygger forsvarsevne og må ha beredskap heile døgnet, heile året. Nå er Elvegårdsmoen Nato Staging area tilrettelagt i Ofoten. Dette gir oss høve til å ta imot store avdelingar og materiell på ein trygg og effektiv måte, seier generalmajor Elisabeth Michelsen, avdelingsdirektør for Forsvarsbyggs avdeling operasjonar og beredskap.

Oberst Gerd Rødland, sjef for forsyningsregimentet i nord fortalte at tidlegare har Forsvaret tatt i bruk idrettshallar og kaiar når materiellet har komme. Campen på Elvegårdsmoen har nær tilknyting til mottakshamnene i Ofoten. Dette blir nå ein nøkkel for mottak og opptrening av allierte styrkar, før vidare utplassering til Indre Troms eller direkte til Sverige og Finland.

Endra aksar – nye behov

Med Finland og Sverige i NATO har kartet endra seg. Tidlegare var nord–sør-aksen dominerande, nå er vest–aust like viktig. Hovudtyngda av mottak skjer i Nord-Noreg, og det krev fasilitetar for både materiell og soldatar. Mange av desse frå heilt andre klimasoner som nå må trene under norske vinterforhold.

Ofoten – eit strategisk område

Ofoten har dei siste fem åra hatt monaleg alliert aktivitet. Samarbeidet mellom forsvarssektoren og det sivile samfunnet har vore ein suksess, i tråd med prinsippa for totalforsvaret: ansvar, likskap, nærleik og samvirke. Å øve på dette kvart året er avgjerande for at ressursane skal finne kvarandre i ein krise.