Lyser ut trafikksikringstiltak på rv. 7 i Måbødalen

- I samband med oppgradering av Lærdalstunnlen som startar neste haust, ventar me ei auke i trafikken på Rv.7 over Hardangervidda. For å gjere vegen betre rusta for trafikken, lyser vi difor ut eit prosjekt for å auke trafikksikkerheita i tunnelane og generelt på strekninga, seier prosjektleiar Eirik Matre Røthe i Statens vegvesen.

Måbødalen ligg i Eidfjord kommune, og det er no lyst ut arbeid i fire tunnelar på strekninga på rv. 7: 

• Kvernhushaugtunnelen - opna i 1983 og er 542 meter lang.
• Måbøtunnelen - opna i 1986 og er 1893 meter lang.
• Storegjeltunnelen - opna i 1980 og er 842 meter lang.
• Dalbergtunnelen - opna i 1967 og er 335 meter lang.

Årsdøgntrafikken i Måbødalen er på ca. 1600 køyretøy, men det er stor trafikkauke på sommaren og mykje aktivitet i samband med turistme til Vøringsfossen. Tunnelane har bratt stigning på ca. 8%.

Får utstyr til å avdekke varmgang

Mellom anna skal det monterast opp termoskannar som registrerer varme i bremsar og motor på tunge køyretøy. Dersom systemet registrerer for høg temperatur, skal køyretøy leiast inn på oppstillingplass for avkjøling.

Andre tiltak som skal gjerast:

• Montering av stengepunkt, bommar og raudblink.
• Levering og montering av naudstasjonar, naudstyreskap, rømningslys og fordelingar.
• Montering av skilt og skiltgalger.
• Graving av grøftar og legging av trekkerøyr.
• Kamera ved bommar.
• Tellesløyfe for automatisk trafikkteljing.
• Automasjon.
• Gatelys.

Vegtrafikksentralen vil få betre oversikt over strekninga når det nye utstyret er installert, med nye bommar og kamera. Per i dag finst det ikkje bommar som kan stenge vegen, dersom bilar får problem i ein av tunnelane.

Statens vegvesen forventar oppstart på arbeidet i månadsskiftet febr/mars, og første delfrist er i slutten av juni. Alt arbeid skal vere ferdig og utstyr testa før Lærdalstunnelen startar oppgraderingsarbeid i september.