Ny rapport: Slik kan klimaet i Noreg bli framover

– Klimatilpassing er ikkje berre ansvaret til styresmaktene. Vi har eit ansvarsprinsipp som betyr at alle i samfunnet, frå offentlege aktørar til bedrifter og privatpersonar, har eit ansvar for å tilpasse seg eit klima i endring. Derfor er det avgjerande med oppdatert og felles kunnskap om korleis klimaet i Noreg vil endre seg framover. Dette bidreg Klima i Noreg-rapporten til, seier Hilde Singsaas, direktør for Miljødirektoratet.

Rapporten er utarbeidd av Norsk Klimaservicesenter på bestilling frå Miljødirektoratet. Den gir oversikt over klimaendringar og gir detaljert informasjon om ei rekkje indikatorar og naturfarar, som nedbør, flaum og skred. Rapporten erstattar ein tidlegare versjon frå 2015.

Klimaendringane blir forsterka framover

Klima i Noreg-rapporten blir eit viktig kunnskapsgrunnlag for alle som jobbar med å planleggje for framtida. Dette er nokre av funna i rapporten:

• Temperaturen kan stige med 3,4 °C fram mot 2100, dersom klimagassutsleppa held fram med å auke. Temperaturauken blir størst i nord.
• Det vil komme oftare og kraftigare styrtregn.
• Viss klimagassutsleppa held fram med å auke, vil vi få større middelflaum og 200-årsflaum i nesten alle delar av landet mot slutten av hundreåret.
• Det blir fleire jord- og flaumskred i samband med fleire og meir intense nedbørsepisodar (styrtregn).
  
  

Les meir om innhaldet i rapporten i Norsk Klimaservicesenters nyheitsmelding her: NTB Kommunikasjon

Vil gi oversikt på fylkes- og kommunenivå

Klima i Noreg-rapporten dannar grunnlaget for fleire analysar som blir brukte av aktørar på lokalt og regionalt nivå, som kommunar og fylkeskommunar.

Dei fylkesvise klimaprofilane, som inneheld klimaframskrivingar fordelte på fylke, blir no oppdatert med ny kunnskap frå rapporten.

Norsk klimaservicesenter jobbar samtidig med ei nedskalering til kommunenivå, for å gi kommunar eit endå betre verktøy for å planleggje for framtida. Desse tala kjem seinare.

Saman med dei fylkesvise klimaprofilane og kommunetala som kjem, gir rapporten eit oppdatert kunnskapsgrunnlag som skal leggjast til grunn mellom anna i lokal og regional planlegging.

Kunnskapen vil også vere viktig for å lage klimarisiko- og sårbarheitsanalysar, anten det er i kommunar, fylkeskommunar, i staten eller i næringslivet.

Les meir om ansvarsprinsippet i klimatilpassing her: Ansvar for klimatilpassing - miljodirektoratet.no

Sjå også: Rettleiar: Korleis ta omsyn til klimaendringar i plan? - miljodirektoratet.no

Nasjonal klimasårbarheitsanalyse

Klima i Noreg-rapporten gir oppdatert kunnskap om korleis klimaet kan bli i Noreg.

Miljødirektoratet leier arbeidet med ein analyse som skal hjelpe oss å forstå korleis samfunnet og naturen er sårbart i møte med klimaendringane.

Les meir om den nasjonale klimasårbarheitsanalysen her: Nasjonal klimasårbarheitsanalyse - miljodirektoratet.no