41 millionar til vassmiljøtiltak over heile landet

For presse: Vedlagt pressemeldinga er ei oversikt over prosjekta som har fått støtte til å betre vassmiljøet i 2025 (Excel-fil).

– Vi har eit klart mål om å styrkje naturrestaureringa og bevare meir natur i heile landet. Tilskotsordningar er viktige for å få fart på arbeidet og sikre brei deltaking. Det gler meg å sjå at så mange gode prosjekt blir utløyste av desse midlane, seier klima- og miljøminister Andreas Bjelland Eriksen.  

– Vatn er livsgrunnlaget for alt som lever. Når éin av fire vassførekomstar i Noreg er negativt påverka av menneskeleg aktivitet, hastar det med å ta grep. Dei 88 prosjekta som no har fått støtte vil bidra til å styrkje økosystema, forbetre vassmiljøet og redusere risikoen for flaum, seier direktør i Miljødirektoratet, Hilde Singsaas. 

Av dei totalt 88 prosjekta som fekk støtte i 2025, var 38 retta mot restaureringstiltak i Oslofjorden, og 50 fordelte på resten av landet.   

Direktoratet melde om tildelingane i Oslofjorden tidlegare i år:  

38 prosjekt skal gi betre vassmiljø i Oslofjorden - miljodirektoratet.no 

Forbetrar miljøtilstanden i elv, innsjø og kystvatn 

Tilskotsordninga for vassmiljøtiltak skal bidra til å forbetre tilstanden i både ferskvatn og kystvatn, som begge blir påverka av ei rekkje faktorar.    

–  Vasskraftutbygging, miljøgifter, framande artar, langtransportert forureining og utslepp frå landbruk, avløp og akvakultur er blant dei største truslane for vassmiljøet, seier Singsaas.  

Midlane går særleg til restaurering, men også til kartlegging og informasjon, og skal støtte opp under måla i vassforskrifta som er å sikre heilskapleg vern og berekraftig bruk av vassmiljøet. Prosjekta som blir gjennomførte er ofte eit spleiselag med kommunar, organisasjonar og næringsliv. 

I år har ordninga mellom anna støtta fjerning av vandringshinder i bekker og elvar, planting av kantvegetasjon, opning av lukka bekkeløp og reetablering av ålegras i kystområde.  

– Tiltaka har gitt sjøaure og laks tilgang til gamle leveområde, styrkt naturmangfaldet og redusert flaumfare. I byar har dei også bidrege til betre bukvalitet, seier Singsaas.  

I Vann-Nett finn du informasjon om miljøtilstanden i elvar, innsjø, grunnvatn og kystvatn i Noreg:  

Vann-nett | Miljøtilstand på vassførekomstar i Noreg  

Økonomisk lønnsamt  

Miljødirektøren understrekar at det å investere i vassmiljøet ikkje berre er viktig for miljøtilstanden i elvar, innsjøar og kystvatn, men at det også er økonomisk lønnsamt. 

– Det lønner seg å satse på grøne løysingar. Ifølgje Det internasjonale Naturpanelet (IPBES) gir restaurering av natur tilbake ti gonger investerte beløp, mellom anna gjennom karbonlagring, dempa flaum og større fiskebestandar, seier Singsaas.  

Stor interesse  

Søknadsrunden for 2025 viser eit stort engasjement for vassmiljøet: 168 søkjarar bad om til saman 87 millionar kroner. Det er meir enn dobbelt så mykje som det som kunne tildelast.  

– Det er inspirerande å sjå kor mange som vil bidra, og som med statleg støtte får høve til å gjennomføre prosjekt som positivt forandrar miljøtilstanden i vatn, seier Singsaas.  

Frist for å søkje på tilskot til vassmiljøtiltak for neste år er 15. januar 2026: 
 
Tilskudd til vannmiljøtiltak, restaureringstiltak Oslofjorden, kalking og anadrome laksefisk - Søknadssenter