Europas miljø er i dårleg forfatning

Sjølv om det er gjort store framsteg når det gjeld å redusere utslepp av klimagassar og luftforureining i Europa, er den generelle miljøtilstanden dårleg.

Rapporten peikar spesielt på ei alvorleg utvikling for det biologiske mangfaldet, som er i ferd med å minke i økosystema på land, i ferskvatn og i havet i Europa. Dette skuldast i hovudsak eit høgt forbruk av naturressursar. Særleg matproduksjonen vert trekt fram som ei hovudårsak til presset på naturen.

Europa varmar seg raskast

Når det gjeld klimaendringar, er Europa det kontinentet på kloten som varmar seg raskast. Klimaet endrar seg i eit uroande tempo og trugar tryggleik, folkehelse, økosystem, infrastruktur og økonomi.

Det finst fleire positive utviklingstrekk. Rapporten framhevar at EU er verdsleiiande i klimaarbeidet, og at unionen har redusert utsleppa av klimagassar og bruken av fossilt brensel, samstundes som delen fornybar energi har dobla seg sidan 2005.

Dei siste 10–15 åra har luftkvaliteten vorte betre, og både resirkulering og ressursbruk har vorte meir effektiv.

Det europeiske miljøbyrået (EEA) legg kvart femte år fram ein miljørapport for Europa, som gir ein omfattande analyse av miljøtilstanden i dei europeiske landa. Rapporten byggjer på miljødata frå 38 land, inkludert Noreg. Europas miljø 2025 er den sjuande rapporten av denne typen som EEA har publisert sidan 1995.

Miljødata frå Noreg i rapporten:

I rapporten vert miljøtilstanden i alle dei 38 landa omtalt. Her er nokre punkt frå Noreg:

• Arealbruk er den største trusselen mot norsk naturmangfald og påverkar 90 % av dei truga artane. Nedgang i bestandar av mellom anna sjøfugl er urovekkjande. Om lag 280 artar av nasjonal interesse er no truga.

• Alle semi-naturlige naturtypar i Noreg er klassifiserte som truga, og ein tredel av dei truga artane finst i slike område.

• Noreg har eit høgt økologisk fotavtrykk som tærer på naturressursane. Vi arbeider med tiltak som berekraftig skogbruk, restaurering av natur og kutt i klimagassutslepp. Vern og restaurering skal styrkjast, særleg gjennom lokal innsats og samarbeid på tvers av sektorar.

• Noreg har forplikta seg til å redusere klimautsleppa med minst 55 % innan 2030 samanlikna med 1990, og samarbeider med EU for å nå målet. Tiltak som CO₂-avgift og deltaking i EUs kvotesystem er innførte, men fleire tiltak er nødvendige for å sikre overgangen til eit lågutsleppssamfunn.

Sjølv om vi reduserer utsleppa nasjonalt og er verdsleiiande på elbilar, fører vårt høge forbruk til utslepp i utlandet.