NVE gjev avslag til å bygge Døvik 2 kraftverk

Hydronor AS har søkt om løyve til å bygge Døvik 2 kraftverk, overføre sideelva Døvikåna og å regulere Paddevatnet med 1 meter. Kraftverket skulle nytte fallet i Paddevassåna, og erstatte Døvik kraftverk som blei satt i drift i 2004. Utbygginga ville økt den årlege produksjonen med om lag 5,5 GWh. 

NVE meiner at ulempene for mellom anna naturtypane kystmyr og kystlynghei ved bygging av Døvik 2 kraftverk er større enn fordelane, og avslår søknaden. 

Utbygging av Døvik 2 kraftverk vil gje terrenginngrep i myr og ein utvald naturtype 

Overføringa av Døvikåna vil gje store, irreversible terrenginngrep i ei kystmyr med stor verdi og den utvalde og sterkt trua naturtypen kystlynghei. Ei degradering av myrareal vil gje utslepp av klimagassar og redusere myra si evne til framtidig lagring. 

Kystlynghei er trua av attgroing som følgje av at menneskeleg skjøtsel har opphøyra. Terrenginngrepa vil føre til permanent skade og fragmentere naturtypen. 

-Omsynet til førekomstar av utvalde naturtypar skal vege tungt for utfallet i slike saker. NVE meiner at det ikkje er mogleg å redusere ulempene for kystmyra og kystlyngheia tilstrekkeleg med avbøtande tiltak, seier Carsten Jensen, seksjonsleiar i NVE.  

NVE legg vekt på konsekvensane for myr og raudlista naturtypar 

Oppdemming av Paddevatnet kan føre til utvasking av eit myrområde og naturtypane gamal fattig sumpskog og flomskogsmark med stor og svært stor verdi. Flomskogsmark er ein raudlista naturtype med status som sårbar (VU). Begge naturtypane har liten utstrekning, slik at reguleringa truleg vil påverke det meste av arealet. 

-NVE meiner at kraftgevinsten på 0,2 GWh som ein får ut av å regulere Paddevatnet ikkje veg opp for ulempene ved tiltaket. Konsekvensane for myr og verdifulle naturtypar er hovudårsakane til at vi avslår Døvik 2 kraftverk, seier Jensen.