Lyser ut E39 Veibustkrysset

-Det er svært gledeleg at vi no er ute av startgropa, seier prosjektleiar Ole Kristian Birkeland i Statens vegvesen.

Veibustkrysset på E39 rett sør for Ålesund skal byggast om til eit nytt toplanskryss med tilhøyrande av- og påkøyringsramper. Eksisterande bru under E39 skal rivast, og det skal byggjast ny bru med to køyrebaner og fortau under brua. Eksisterande busslommer inntil E39 skal stå omtrent som før, og det skal byggjast nødvendig gangvegsystem frå busslommene og fram til kommunalt vegnett.

Det er utfordrande å komme seg inn på E39 frå lokalveg/industriområde på grunn av den store trafikken på E39. Spesielt når ein skal svinge til venstre og må ha klar køyrebane i to retningar, kan ein bli ståande lenge før ein kjem seg inn på E39. Dette er også med på å skape farlege situasjonar.

Ministeren nøgd

I samband med framlegg av forslag til statsbudsjett 2025, vart prosjektet føreslått med oppstartsmidler i 2025. Samferdselsminister Jon-Ivar Nygård stadfesta personleg at prosjektet fekk finansiering, under eit besøk til Ålesund i september i fjor. Nygård er no nøgd med at prosjektet er ute på marknaden:

-Eg er glad for at Statens vegvesen no har lyst ut arbeidet med E39 Veibustkrysset. Denne utbedringa vil gjere det tryggare og meir forutsigbart for bilistar i Ålesundsområdet, og nytt fortau under brua vil gjere det tryggare for dei som velger sykkel og gange, seier samferdselsminister Jon-Ivar Nygård.

Startar førebuande arbeid

Medan tilbodsprosessen går sin gang ut over hausten, vil det no i september bli satt i gang førebuande arbeid i Veibustkrysset. Dette inkluderer omlegging av høgspentkablar og lagring av stein som skal nyttast på veganlegget.