God start for pukkellaksfella i den viktige Tanaelva

– Tanaelva er ei av dei viktigaste lakseelvane i verda. Pukkellaksen er ein trussel mot atlantisk villaks, og det er svært positivt at pukkellaksefella så langt ser ut til å fungere godt. Her er det lagt ned mykje arbeid i forkant, med bidrag frå både lakseforskarar og lokale fiskarar. Den tette overvakinga gir tryggleik for at både villaks og andre lokale artar i elva blir varetekne, seier klima- og miljøminister Andreas Bjelland Eriksen. 

– Førebels ser den 400 meter lange pukkelaksfella i Tana ut til å fungere godt. Pukkellaks blir teken ut og slakta medan mykje atlantisk laks og andre lokale artar har vorte sleppt uskadd vidare, seier direktør i Miljødirektoratet, Hilde Singsaas.

Halvparten av pukkellaksen tekne i Tanaelva

Så langt er totalt 29 000 pukkellaks fanga i elvane med pukkellaksfeller, mesteparten i Finnmark. Av desse er nesten 13 300 tekne ut i Tanaelva, som blir rekna som ei av dei viktigaste lakseelvane i verda. Førebels er det små førekomstar av pukkellaks elles i landet.

Veterinærinstituttet driftar fella i Tanaelva på oppdrag frå Miljødirektoratet.  Ein viktig jobb er å sørgje for at atlantisk villaks og andre lokale artar kjem seg forbi fella. Veterinærinstituttet får hjelp av Norsk institutt for naturforsking (NINA), Mohn Tecnology og det finske naturressursinstituttet, Luke, i ei omfattande overvaking av villaksen i området ovanfor og nedanfor fella ved Seida i Tana. Overvakinga gir viktig informasjon for å vurdere behov for ekstra tiltak for å sleppe forbi villaks, som står nedanfor fella. I tillegg til villaks blir også dei andre lokale fiskeartane sortert ut frå pukkellaksen i fangstbura. Begge delar har så langt fungert godt.

– Det er svært viktig å lykkast med å stoppe pukkellaksen frå å gå opp og formeire seg i Tanaelva, for elva har eit stort potensial til å produsere pukkellakseyngel. Samtidig er det teknisk komplisert, sidan elva er 400 meter brei der fella står. I 2023 stoppa vi berre ein liten del av dei rundt 170 000 pukkellaksane som sumde opp i Tana-elva. Det ser førebels ut til at den nye fella, som er plassert på ny stad i elva, fungerer langt betre, seier miljødirektør Hilde Singsaas.

Følg fangsten frå dag til dag

Statsforvaltaren i Troms og Finnmark oppdaterer jamleg med nyheiter om pukkellaksefangsten i omtrent 60 andre elvar som dei har ansvaret for.

På Miljødirektoratets temaside om pukkellaks kan ein følgje pukkellaksefangsten frå dag til dag.

Kom 580 000 pukkellaks ved førre invasjon

Ved førre pukkellaksinvasjon i 2023 registrerte Norsk institutt for naturforsking (NINA) nesten 580 000 pukkellaks i norske elvar og kystområde. Av desse kom 97 prosent til Finnmark. Rundt 250 000 pukkellaks vart fanga i 2023. NINA gjennomførte desse berekningane i 2023 på oppdrag frå Miljødirektoratet, og vil gjere det same i etterkant av pukkellakssesongen i år.