25 distriktskommunar får støtte til nye bustadtiltak

Husbanken mottok 129 søknader på til saman 125 millionar kroner innan fristen 1. april. 47 av desse gjaldt bustadtiltak i distrikta. Saman med Distriktssenteret har Husbanken valt ut 25 prosjekt som får støtte.

Døme på prosjekt som får støtte

Samhandling for bustadutvikling i små kommunar

Holtålen kommune får 640 000 kroner til å samle fagmiljø og koordinere bustadutviklinga. Små kommunar har ofte ikkje ressursar til eigne bustadkontor, og prosjektet skal teste ut ei ny løysing for samhandling.

Smarthus og velferdsteknologi

Meløy kommune får 1 310 000 kroner til å greie ut korleis smarthus og velferdsteknologi kan brukast i aldersvennlege og fleirfunksjonelle bumiljø. Dei skal samarbeide med teknologileverandørar og fagmiljø for å utvikle konsept som kan overførast til andre kommunar.

Møteplass for nytenking i bustadbygg

Dyrøy kommune får 400 000 kroner til å etablere ein møteplass for samarbeid mellom kommunen, utbyggjarar og arkitektar. Målet er å finne nye, fleksible måtar å bygge bustader på, og dermed auke bustadbygginga. Prosjektet byggjer vidare på nettsida boidyrøy.no, etablert i 2024.

Samarbeidsmodell for bustader i sentrum

Åsnes kommune får 615 000 kroner for å utvikle ein samarbeidsmodell for offentleg og privat sektor. Modellen skal vise korleis ulike aktørar kan jobbe saman for å skaffe bustader i Flisa sentrum - særleg bustader for eldre.

Konkurranse om nytt sentrumsbygg med bustader og næring

Åseral kommune får 1 000 000 kroner til ein plan- og designkonkurranse for eit nytt sentrumsbygg med omsorgsbustader, ordinære leilegheiter og næringsareal. Prosjektet skal også omfatte medverknad, reguleringsarbeid og planlegging av uteområde.

Kartlegging av bustadbehov for framtida

Bømlo kommune får 553 000 kroner til å kartlegge bustadbehov og utfordringar - særleg for eldre og personar som treng tilrettelagt bustad. Kommunen skal samarbeide med innbyggjarar, arkitektar, Husbanken og nabokommunar for å utvikle konkrete forslag til framtidsretta bustadområde.

Dette skal til for å få tilskot

For å få tilskot, må tiltaka bidra til

• auka bustadbygging
• eit meir variert bustadtilbod
• tilgang til fleire eigna bustader for ulike grupper i distriktskommunar

Kommunane skal utvikle nye samarbeidsformer og forsøk med nye bustadkonsept og verkemiddel, til dømes:

• modellar for å eige, dele eller leige
• ordningar som reduserer risiko og fare for tap ved sal av nye bustader
• samarbeid med utbyggjarar og andre for å styrke eige- og utleigemarknaden
• interkommunalt samarbeid om bustadutvikling
• inkluderande, sosiale og fleirfunksjonelle bumiljø
• transformasjon og gjenbruk av eksisterande bygg
• kunnskapsdeling om effektar og gevinstar av bustadsatsingar

– Vi har også lagt vekt på at prosjekta skal dokumentere og dele kunnskapen dei utviklar, slik at andre kan lære av det, seier prosjektleiar Gry Kongsli i Husbanken.

Husbanken og Distriktssenteret vil følgje opp kommunane som får tilskot, blant anna med kompetansestøtte og arenaer for å dele erfaringar.

Desse prosjekta får tilskot

Søkar	Namn på prosjekt	Beløp
Berlevåg kommune	Studio Bygdevekst Vestre Varanger - Kurs ved NTNU, Fakultet ved Arkitektur og planlegging - Steds- og boligutvikling i Vestre Varanger	1 050 000
Bindal kommune	Bo trygt og nært i Bindal kommune	700 000
Bømlo kommune	Eit generasjonsvenleg samfunn ved kysten med gode bumiljø og høg livskvalitet	553 000
Dyrøy kommune	Bo i Dyrøy - Utvikling av fleksible boformer i distriktskommuner	400 000
Gjemnes kommune	Boliger til tvers og interkommunalt samarbeid	600 000
Grue kommune	Offentlig og privat samarbeid for boligutvikling i Grue	840 000
Hamarøy kommune	Revitalisering av kommunal boligmasse i Hamarøy kommune	980 000
Hemsedal kommune	Fra skole til prioriterte boligformål i Hemsedal	1 000 000
Holtålen kommune	Riktig samhandling for aktiv boligutvikling i Holtålen	640 000
Hyllestad kommune	Bu i Hyllestad, her kan du leige til eige, eller få gjenkjøpsgaranti om du vil vere i tvil	900 000
Høylandet kommune	Boligsosialt forprosjekt i Miljøarbeidertjenesten	1 050 000
Kautokeino kommune	Ruoktu mu vaimmus (boligtiltak som ivaretar samisk kultur, identitet og språk)	1 150 000
Lom kommune	Omstilling - frå ord til handling	410 000
Luster kommune	Samarbeid om boligutvikling i Luster kommune	840 000
Meløy kommune	Smarte boliger for aldersvennlig boligutvikling i Meløy	1 310 000
Nordreisa kommune	Identifisering av eksisterende bygg med potensial for transformasjon i Nord-Troms	1 200 000
Rindal kommune	Framtidsrettet boligutvikling for eldre	600 000
Røyrvik kommune	Røyrvik fjellandsby - nye boformer og bygdevekst i Indre Namdal	1 000 000
Smøla Nærings- og kultur-senter	Innbyggere i sentrum - Smøla & Aure	900 000
Solund kommune	IOS (Informasjon, Organisasjon, Samarbeid)- prosjekt for å utvikle en modell for forbedret kommunalt utviklingsarbeid på boligfeltet i mindre distriktskommuner	830 000
Sunnfjord	Viksdalstunet	300 000
Sør-Varanger	Fra Silo til samspill-bolig som felles løft for Sør-Varanger kommune	907 000
Vang kommune	Bustadutvikling i Vang sentrum i kombinasjon med 13-15 nye omsorgsbustader	700 000
Vegårshei kommune	Slik vil jeg bo - Steg for steg mot egen bolig	525 000
Åseral kommune	Nytt sentrumsbygg Åseral sentrum	1 000 000
Åsnes kommune	"Utvikling av Flisa Sentrum - offentlig og privat samarbeid for framtidens boliger"	615 000

Fakta: 

Tilskotet er ein del av ordninga Tilskot til bustadtiltak. Dei andre to delane er bustadsosiale tiltak og tilskot til Leieboerforeningen. Den totale tilskotsramma i 20205 er 38,9 millionar kroner.