Færre elgkalvar i Noreg - meld frå om sjuke eller døde dyr

–Dei siste åra har vi sett at det blir færre elgkalvar i store delar av Noreg, og dei elgkalvane som finst er ofte små, seier prosjektleiar og spesialist i vilthelse ved Veterinærinstituttet, Bjørnar Ytrehus.

Han fortel at i mange område blir det rapportert funn av sjuke og døde elgkalvar. Problema ser ut til å vere størst langs kysten av Austlandet, Agder og Trøndelag, men også i andre område ser ein at tilveksten til elgkalvane er nedovergåande.

Skal undersøkje flest mogleg elgkalvar

Forskingsprosjektet Elgkalven Trampe som blir drive av Veterinærinstituttet, har som mål å undersøkje flest mogleg av dei elgkalvane som blir funne døde eller som er så sjuke at dei blir avliva. Prosjektet blei starta opp i 2024 og held fram med utvida styrke i 2025.

–Vi synest prosjektet gir oss svært mykje ny kunnskap, seier Ytrehus.

–Hovudfunnet er at kalvane rett og slett er avmagra. Dei døyr då sannsynlegvis av ein kombinasjon av svolt og tilfeldige infeksjonar. I tillegg ser vi at dei fleste av desse kalvane er infiserte med den flåttborne bakterien Anaplasma og ein god del har tarmparasitten Giardia. Det er likevel for tidleg å seie kva som er årsaka til at dei er så magre. Teorien vår er at dette kjem av eit samspel mellom varmestress, endringar i næringsverdien til plantane elgkalvane et og fleire sjukdommar, fortel han.

Dette gjer du om du finn ein sjuk eller død elgkalv

Prosjektet har kontaktpersonar i Agder, Telemark, Vestfold, Buskerud, Akershus, Østfold, Innlandet og Fosen i Trøndelag som kan kontaktast om du finn ein død elgkalv. Om du finn ein elgkalv som verkar sjuk, så skal du kontakte fallviltgruppa i kommunen, gjerne gjennom politiet på tlf. 02800. Fallviltgruppa vil då avgjere om kalven er så alvorleg sjuk at han må avlivast, og kan i så fall ta kontakt med den lokale trampe-kontakten.

–Det er viktig å få kunnskap frå fleire år, slik at vi til dømes kan sjå korleis sommarvêret påverkar helsa og overlevinga til dyra, seier Ytrehus.

 –Det vi håpar er at nokre av faktorane bak utviklinga kan påverkast, slik at vi får fleire sunne og sterke elgkalvar som har eit godt liv.

Prosjektet blir finansiert med midlar frå Landbruksdirektoratet og Agder, Telemark, Vestfold, Buskerud, Østfold, Akershus, Innlandet og Trøndelag fylkeskommunar og blir gjennomført med støtte frå Noregs jeger- og fiskarforbund og Universitetet i Innlandet.

Les meir om forskingsprosjektet Trampe