Sámepolitihkalaš presideantadigaštallan dán jagi Riddu Riđđus

Dán jagi Riddu Riđđu festivála lágiduvvo suoidnemánu 9.-13.b., festiválan mas vuhtto ahte lea sámediggeválga.

Nordkalottfolket ja NSR gilvaleaba šaddat stuorimus bellodahkan, ja oaiviliskkadallamat čujuhit ahte bellodagat dáidet leat oalle dássálaga dán jagi sámediggeválggas.     

Riddu Riđđu čohkke presideantakandidáhtaid, Nordkalottfolketa Vibeke Larsena ja Silje Karine Muotka NSR:s, digaštallamii festiválaáigge.

Jus Vibeke Larsen šaddá presideantan, mo áigu son ja Sámediggi bealuštit ja rahčat eamiálbmotvuoigatvuođaid ovddas? Galgá go Sámedikkis leat unnit dadjamuš ja suohkaniin eanet sámi áššiin? Jus Silje Karine Muotka joatká, šaddá go Sámediggi de “vuosttaldan-diggin” mii doallá akšuvnnaid ja dahká riekteáššiid?

Muhto, geas lea duođas vuoigatvuohta jienastit sámediggeválggas? Maŋemus jagiid lea Sámedikki jienastuslohku leamaš garra digaštallamiid oapmin – sihke siskkáldasat Sámis ja norgga stuoraservvodagas. Mii čohkket politihkkariid ja sin geain lea jienastanvuoigatvuohta rabas ságastallamii mas fáddán lea maid jienastuslohku mearkkaša duohtadilis, mo dat doaibmá oidne ja lea go dan dárbbašlaš rievdadit.

Riddu Riđđu Festivála lea Olmmáivákkis Gáivuonas, ja lágiduvvo 34. geardde dán  jagi. Festivála beassá dán jagi ovdandivvut nanu musihkalaš namaid nugo Marja Mortensson (Sápmi), Kajsa Balto (Sápmi), Intrigue (Sápmi), Simon Issát Marainen (Sápmi), Ailu Valle ja Amoc (Sápmi), Aysanabee (Canada), Northern Cree (Canada),  NiNi (Taiwan), RSP & Thomax (Norga), Sara Curruchich (Guatemala) ja Sauwestari (Kalaallit Nunaat).

Gávnnat ollislaš festiválaprográmma riddu.no siiddus.