Første pukkellaks har gått i fella

–  No er  dei  første pukkellaksane i Nord-Noreg byrja å gå i fella i elvane, men den største oppgangen ventar vi i slutten av juli, seier direktør for Miljødirektoratet, Hilde Singsaas.

– Regjeringa er oppteken av å redde villaksen, og det å få bukt med pukkellaks er eit viktig tiltak. Vi har eit ansvar for å stanse pukkellaks frå å etablere seg i norske elvar, og for å forhindre at han spreier seg vidare til andre land. Også i år er vi veldig godt førebudde, med statleg finansierte tiltak i over 60 elvar. Dette er over dobbelt så mange som i 2023, seier klima- og miljøminister Andreas Bjelland Eriksen.

Normalt at nokre få pukkellaks kjem tidleg 

Natt til laurdag hamna 3 pukkellaksar i fangstburet i Munkelva. Dei første av over 50 statleg finansierte pukkellaksefeller stod ferdig monterte i Munkelva og Karpelva fredag. Fangsten er også i gang i Neiden. Alle desse tre elvane er i Sør-Varanger kommune. 

–  Som i 2023 ser vi at dei første pukkellaksane går opp i elvane i slutten av juni. Vi håpar at dei fleste fellene kan setjast ut før det blir stor oppgang, men dei lokale foreiningane som gjer jobben må vente til flaumen er over slik at det er trygt å jobbe i elva seier miljødirektør Hilde Singsaas.

Feller er på veg opp og kan vere på plass allereie no i andre elvar òg.

Mykje vatn i elvane gir utfordringar 

Sein snøsmelting i fjella gjer at det er mykje vatn og sterk straum i elvane i Nord-Noreg, særleg i Troms. 

–  Vi har tru på at vi kan klare å stoppe pukkellaksen endå meir effektivt enn ved førre invasjon i 2023. Samtidig rår  vi ikkje over forhold i naturen som speler ei vesentleg rolle for arbeidet, slik som mengd vatn i elvane, seier Hilde Singsaas. 

Både statlege og lokale tiltak mot pukkellaksen 

Pukkellaksen kjem til norske elvar annakvart år, og i sommar er den uønskte framandarten venta å komme i stort tal til elvane i Nord-Noreg. Staten finansierer feller og andre tiltak mot pukkellaksen i 63 elvar. I tillegg er det mange lokale initiativ som speler ei viktig rolle. 

Les meir om pukkellaks