Øvde på totalforsvar

Øvinga føregjekk i to veker på Vestlandet.

Vegvesenet var med på den delen som fann stad på Hardangerbrua. Sikring av kritiske samferdselsobjekt stod på agendaen.

Vegvesenet: – Sikrar forsyning av landet

– Det er viktig for beredskap og samfunnsikkerheit at vi øver saman med andre offentlige etatar og vidareutviklar vår rolle i totalforsvaret, seier vegdirektør Ingrid Dahl Hovland.

– Gjennom øvingar avdekker vi moglege sårbarheiter og sikrar forsyning av landet  i kritiske situasjonar. Dette er viktigare i dag enn nokon gong, legg ho til.

Forsvaret: – Heilt avgjerande

Kommandørkaptein Christian Couillault er sjef for Minedykkerkommandoen i Forsvaret.

Øving i fellesskap med andre offentlege etatar er heilt avgjerande for at totalforsvaret skal fungera når det gjeld som mest, seier han.

– For Forsvaret har det stor verdi å trena saman med aktørar som har ansvar for kritisk infrastruktur og viktige samfunnsfunksjonar – både for å forstå behova deira, og for å sikra at me saman kan handtera krevjande situasjonar. Dette styrkjer vår evne til samvirke, både i førebygging, krise og krig.

Øvinga med Statens vegvesen og politi gav oss viktig innsikt i korleis me på ein effektiv og trygg måte kan sikra kritiske samferdselsobjekt som bruer og tunnelar, legg han til

– Det er nettopp i slike kryssingspunkt mellom det sivile og det militære at totalforsvaret kjem til sin rett. Vi fekk mellom anna testa prosedyrar for koordinering, sikring og informasjonsdeling – alt med mål om å styrkja den samla beredskapen i samfunnet. Erfaringane herifrå vil me bruka vidare i arbeidet vårt med å utvikla operative planar og forbetra samhandlinga i totalforsvaret, legg han til.

Om denne øvinga konkret seier Christian Couillault:

– Øvinga gav Minedykkerkommandoen høve til å operera i nye og krevjande omgjevnader, med eit tidspress for å gjenoppretta normaltilstand på grunn av dei samfunnsmessige konsekvensane ei stengd bru har. Det var også stor verdi å erfara samspelet med Politiets bombegrupper , Vegvesenets personell, og deira inngåande kjennskap til strukturelle forhold på brua.  Kompetansen bidrog til auka varetaking av personelltryggleik, materielle verdiar og ei heilskapleg oppdragsløysing.