Per Sanderud er ny styreleiar i Bane NOR

–  Bane NOR skal bidra til å fornye, vedlikehalde og utvikle jernbanen, slik at både passasjerar og varer kjem fram til riktig tid. Dette krev eit sterkt Bane NOR og god samhandling i jernbanesektoren. Per Sanderud har brei leiarerfaring frå departement og statleg infrastrukturverksemd. Dette er særleg relevant for Bane NORs oppgåver, seier samferdselsminister Jon Ivar Nygård.

Nasjonal og internasjonal leiarerfaring

Per Sanderud (1953, Oslo) er utdanna samfunnsøkonom. Sanderud har erfaring frå fleire departement, og har vore departementsråd i både Samferdselsdepartementet (1997-2005) og Nærings- og handelsdepartementet (2005-2007). Sanderud har også vore president i EFTAs overvakingsorgan ESA (2007-2011).  I tillegg har han vore direktør i Noregs vassdrags- og energidirektorat (2011-2018) og styremedlem i Den europeiske utviklingsbanken (2018-2022). Han har leia fleire regjeringsoppnemnde utgreiingar og har hatt fleire styreverv.

Styrets samansetjing

Etter foretaksmøtet består styret i Bane NOR SF av følgjande medlem:

Per Sanderud (1953, Oslo, aksjonærvald)
Hildegunn Naas-Bibow (1972, Oslo, aksjonærvald)
Eli Giske (1964, Akershus, aksjonærvald)
Ståle Gjersvold (1965, Trøndelag, aksjonærvald)
Renate Larsen (1975, Troms, aksjonærvald)
Adele Norman Pran (1970, Oslo, aksjonærvald)
Tore Olaf Rimmereid (1962, Oslo, aksjonærvald)
Bente Langeland Roheim (tilsetterepresentant)
Lars Øyvind Sannes (tilsetterepresentant)
Ola Rune Kleiven (observatør, tilsetterepresentant)
Bård Johnsen (observatør, tilsetterepresentant)

Om Bane NOR SF

Bane NOR har ansvaret for planlegging, utbygging, forvalting, drift og vedlikehald av det nasjonale jernbanenettet, trafikkstyring, og forvalting og utvikling av jernbaneeigedom.

Staten eig 100 prosent av Bane NOR. Statens mål med eigarskapen er kostnadseffektiv forvalting og utvikling av ein sikker og tilgjengeleg jernbaneinfrastruktur og jernbanerelatert eigedomsverksemd.