Ođđa festiválabuvttadeaddji Riddu Riđđu festiválas

Riddu Riđđu illuda dieđihit ahte mii leat nannen joavkku Ann Cecilie Hættain ođđa festiválabuvttadeaddjin. Hætta lea ođđa olmmoš Riddu Riđus ja festivála illuda duođas go son searvá jovkui.

Festiválabuvttadeaddjin Hætta šaddá dehálaš oassin joavkkus mii pláne ja ollašuhttá festivála prográmma.

Hættas lea kulturprošeaktajođiheami oahppu Innlandet allaskuvllas ja ealáhushálddašeami oahppu UiT:s, ja lea ovdal bargan Dølajazzas ja Norsk litterturfestivalas. Son boahtá Riddu Riđđui sámedikkis virggis gos barggai rekrutteret sámegielat studeanttaid alit ohppui.

Hætta dadjá:

“Mun dovddan iežan hirbmat lihkolažžan go beasan leat oassin Riddu Riđđu joavkkus. Go lean bajásšaddan Ráissas, de lean searvan festiválii measta juohke geasi ja festivála lea šaddan dehálaš deaivvadanbáikin munnje. Báiki gos lean beassan deaivvadit earáiguin ja dovdat searvevuođa dovddu. Mearkkaša olu go dál beasan veahkkin fievrridit viidásit dán earenoamáš arena eamiálbmotkultuvrii ja illudan hui olu álgit. Mun illudan bargagoahtit buvttadeaddjin ja ráhkadit nana ja mearkkašahtti vásáhusaid ovttas joavkkuin.”

Festiválajođiheaddji, Sajje Solbakk, lea hui duhtavaš virgádemiin:

“Ann Cecilie lea hárjánan festiválabargi, guhte šaddá hui árvvolaš lasáhussan Riddu jovkui. Ja ii unnimus, midjiide lea illu oažžut vel ovtta sámegielat bargi festiválii!”

Hætta álgá virgái festiválabuvttadeaddjin suoidnemánu 1. beaivvi, ja lea mielde dán jagi festiválas, mii lea suoidnemánu 9. beaivvis 13. beaivái 2025 Olmmáivákkis Gáivuona suohkanis.