Lovbrot i naturen får konsekvensar

– Det er dessverre ein god del ulovleg ferdsel og opphald i fuglefredingsområde, mellom anna på holmar og øyar i Oslofjorden. Ulovleg ferdsel og brot på bandtvangen kan føre til at fuglane ikkje bruker viktige område til hekking eller at hekkinga blir mislykka, seier direktør for Miljødirektoratet, Hilde Singsaas. 

– Det er ikkje nok å verne naturen. Vi må også sørgje for at reglane i verneforskriftene blir følgde. Måten Miljødirektoratet følgjer opp på er viktig for å gjere folk meir medvite på desse reglane, seier klima- og miljøminister Andreas Bjelland Eriksen.  

Sjå òg: Slik reagerer vi på miljøkriminalitet  

Fekk gebyr-fullmakt for to år sidan 

Miljødirektoratet fekk fullmakt til å gi gebyr for brot på naturmangfaldlova for to år sidan. På dei to åra har direktoratet gitt nærare 100 slike straffegebyr. Mange av gebyra er gitt til folk som ulovleg høgg tre, slepper hunden, ferdast i fuglefredingsområde, flyg dronar, bruker el-sykkel eller driv andre forbodne aktivitetar i verneområde.  

Brot på ferdselsforbodet i hekkesesongen vil normalt resultere i eit straffegebyr på 7000 kroner, medan brot på bandtvangsreglar i verneområde kan koste hundeeigaren 6000 kroner.  For mange verneområde gjeld det eigne føresegner om bandtvang. Etter hundelova gjeld det ein alminneleg bandtvang frå 1. april til og med 20. august. 

El-sykkel aukande trussel mot villrein 

Nyleg gav Miljødirektoratet 12.000 kroner i straffegebyr til ein person som hadde med seg motorsag, felte tre og la seg opp ved for ein meir permanent leirplass i eit verneområde. I ein del verneområde er droneflyging og el-sykling forboden, og brot på forbodet kostar normalt 6000 kroner i begge tilfelle.  

– El-sykling gjer at folk kjem seg raskare og lengre inn i fjellet, i meir sårbare område. Det utgjer ein aukande trussel for mellom anna villrein, seier miljødirektør Hilde Singsaas. 

Sjekk ferdselsreglar før tur i verneområde 

– Verneområda våre er oppretta for å verne umisteleg natur og sårbart dyreliv. Då er det viktig at folk sjekkar og følgjer reglane i verneforskriftene, særleg no når fuglar og dyr får ungar. Eg håpar gebyra bidreg til at færre bryt reglane slik at naturen blir betre beskytta, seier klima- og miljøminister Andreas Bjelland Eriksen.  

Miljødirektør Singsaas understrekar at folk må setje seg inn i ferdselsreglar som gjeld i verneområde.  

– Skal du på båt- eller padletur i skjergarden, kan du spare både sårbar natur og lommeboka di om du sjekkar på førehand om det er fuglefredingsområde der du skal, oppmodar Singsaas.

Alle store verneområde, det vil seie nasjonalparkar og nokre landskapsvernområde, har eigne nettsider med informasjon om gjeldande reglar. 

Sjå kart over kvar det er ferdselsforbod, og les meir om ferdselsforbod her: 

https://www.miljodirektoratet.no/vev/ferdselsforbud/ 

Alle verneområde har ei eiga forskrift som viser kva som er lov, men her kan du lese litt generelt om kva reglar som kan gjelde: 

https://www.miljodirektoratet.no/ansvarsomrader/vernet-natur/norges-verneomrader/#hvaerlov 

Les meir om ferdsel i verneområde på nettsida Noregs nasjonalparkar:

Ferdsel i verneområde 

Alle reglane som gjeld i eit spesifikt verneområde finn du ved å søkje opp verneforskrifta for området i lovdata. Søk på namnet til verneområdet: 

https://lovdata.no/ 

– Viktig for å auke respekten 

Mindre alvorlege endringar på byggverk, terrenginngrep eller dumping av massar i verneområde er det også ein del av. Det er gitt 20-30.000 kroner i gebyr for slike forseelser. I tillegg vil det ofte bli pålagt retting.  Meir omfattande bygging, større terrenginngrep eller dumping av avfall i verneområde blir meld. 

– Ordninga med straffegebyr for brot på naturmangfaldlova rettar seg mot både privatpersonar og verksemder, og er viktige for å auke respekten for regelverket og sikre meir naturvennleg ferdsel spesielt i verneområde, seier Singsaas. 

Sprang etter villrein og jaga kongeørn med drone 

Nokre saker er så alvorlege at dei blir politimelde. Ein person fekk førelegg av politiet for å springe etter ein villreinflokk i eit verneområde for å fotografere og jage flokken slik at dei flytta seg gong på gong. Denne hendinga vart filma av Statens naturoppsyn, og vart meld. I tillegg har politiet gitt totalt 45.000 kroner i bot i til to menn for å jage ei kongeørn med drone.