NVE tilrår nye konsesjonsvilkår for Flatdalsvassdraget, Dalaåi og Morgedalsåi

I 1963 ble det gitt løyve til å regulere Flatdalsvassdraget, Dalaåi og Morgedalsåi, for utnytting i Sundsbarm kraftverk. På bakgrunn av krav frå Seljord, Kviteseid og Tokke kommunar, har NVE handsama revisjon av konsesjonsvilkåra for reguleringane. Hovudformålet med ein vilkårsrevisjon er å betre natur - og miljøforholda gjennom tiltak som avbøter ulemper og negative verknader som reguleringa har medført. Reviderte konsesjonsvilkår avgjerast ved kongeleg resolusjon.

–Vi tilrår nye og moderne konsesjonsvilkår. Dette vil gjere det mogleg å stille krav om avbøtande tiltak som reduserer påverknaden på miljøet og naturen i og rundt vassdraga, seier Carsten Jensen, seksjonssjef i NVE.

NVE vil auke minstevassføringa i vassdraga

NVE tilrår pålegg av minstevassføring i Vallaråi ved utløpet av Sundsbarm kraftverk. Dette vil etter NVE si meining styrke den viktige og trua bestanden av storørret i Seljordsvatn, og som gyter i Vallaråi. Ein minstevassføring vil redusere faren for tørrlegging av rogn og stranding av ungfisk, og redusere dei store endringane i vasstemperatur gjennom døgnet.

Vidare tilrår NVE å auke minstevassføringa i Flatdalsvassdraget, Dalaåi og Morgedalsåi, av omsyn til fisk, landskap og friluftsliv. NVE tilrår òg at det blir lagd ein plan for miljøtiltak og opprydding i vassdraga.

Tilrådd minstevassføring vil føre til eit krafttap på 6,4 GWh, som utgjer 1,6 % av total årleg produksjon i kraftverket.

Tilrår tiltak for å betre forholda for aure og villrein

NVE tilrår at Sundsbarm Kraftverk DA skal greie ut fisketrapp forbi Lakshølfossen og Eisanfossen. Om slike trapper blir pålagt av myndigheitene etter utgreiinga, kan gyteområdet for storauren bli utvida oppover i Flatdøla.

I tillegg tilrår NVE at Sundsbarm Kraftverk DA skal betale til eit fond til tiltak for villrein i Brattfjell-Vindeggen villreinområde. 

–De tilrådde tiltaka vil kunne være viktige for storauren i Seljordsvatnet, for vassdraga som landskapselement i dalføra, for villrein i området og for friluftsliv, seier Jensen.  

NVE tilrår ikkje restriksjonar på reguleringa av Sundsbarmvatn, fordi fordelane for fisk, landskap og friluftsliv ikkje veg opp for tapet av fleksibilitet i kraftproduksjonen.