Støttar beredskapsplanar i kommunane

Nytt av året er at fleire har søkt tilskot til risiko- og sårbarheitsanalysar:

– Kulturarven betyr mykje for mange. Den skaper tryggleik og tilhøyrsel, og gir oss både opplevingar og ny kunnskap. Derfor er det viktig at kommunane tek vare på kulturminna sine, også gjennom beredskapsplanar. Kommunane er førstelinja når kulturarven er trua. Med denne støtta håpar eg mange kommunar får kartlagt kulturminna og kulturmiljøa sine, samtidig som dei kan planleggja korleis dei kan sikra dei, seier klima- og miljøminister Andreas Bjelland Eriksen.

Det kom inn i alt 45 søknader frå kommunar fordelte over nesten heile landet. For 2025 er tilskotsspotten på 14,4 millionar, der fem millionar er øyremerkte til Vega kommune for utvikling av berekraftig næring innanfor ramma av verdsarvverdiane. Tilskota skal støtta kommunane i å laga gode planar for kulturminna sine, slik at kommunane kan ta betre vare på kulturarven.

– Når eit kulturminne forsvinn, så er det borte for alltid, seier riksantikvar Hanna Geiran.

– Me har jobba fram ein ny rettleiar som skal gjera det enklare for kommunane å gjera risikovurdering av kulturminna  sine, anten det gjeld ras, flaum, styrtregn, brann eller krig og terror. Derfor er det gledeleg å sjå at så mange kommunar vil følgja opp kulturarven i beredskapsarbeidet.

Kommunane som får tilskotet til risiko- og sårbarheitsanalysar er Gjerdrum kommune i Akershus, Lillehammer i Innlandet, Alta i Finnmark, Herøy, Hareid og Stranda i Møre og Romsdal, Tysvær og Sokndal i Rogaland, Horten i Vestfold og Fredrikstad i Østfold, Melhus og Indre Fosen i Trøndelag, Målselv i Troms, og dessutan Bergen, Voss, Ullensvang, Øygarden og Sogndal i Vestland fylke.

Gratis kompetanseheving for kommunane

I 2025 gjennomfører Riksantikvaren kurs for kommunetilsette i fire fylkeskommunar for å auka kompetansen blant tilsette som jobbar med kulturminne og dessutan plan- og byggjesaker. Kursa er kostnadsfrie for kommunane, og i år er det kurs for kommunane i Vestfold og Akershus før sommaren, og Østfold og Troms til hausten/vinteren.  

–Alle kulturminne ligg i ein kommune, og det er kommunane står for vern av dei fleste kulturminna i Noreg, seier Hanna Geiran.

–Derfor er det heilt sentralt at kommunane har god kunnskap om kulturmiljø og korleis dei kan bruka lover og reglar til beste for kulturarven.

Innan utgangen av året skal alle kommunar i 10 fylke ha fått tilbod om kurs.

Desse får tilskot:

 

Fylke	Tilskudd  fylkeskommune	Kommune	Tilskudd kommuner	Totalt
Akershus	500000	Gjerdrum	150000	900000
		Asker	150000
		Jevnaker	100000
Agder	0	Åmli	100000	100000
Buskerud	400000	Flå	50000	750000
		Hemsedal	150000
		Modum	50000
		Ringerike	100000
Finnmark	50000	Alta	200000	400000
		Gamvik	150000
Innlandet	300000	Øystre Slidre	100000	750000
		Østre Toten	50000
		Nord-Aurdal	150000
		Lillehammer	150000
Møre og Romsdal	300000	Stranda	150000	1000000
		Sula	100000
		Fjord	100000
		Herøy	100000
		Hareid	100000
		Ålesund	150000
Nordland	500000	Lødingen	100000	650000
		Hamarøy	50000
Rogaland	100000	Haugesund	150000	500000
		Tysvær	150000
		Sokndal	100000
Sametinget	200000			200000
Troms	0	Målselv	50000	50000
Trøndelag	250000	Melhus	150000	600000
		Indre Fosen	200000
Vestland	300000	Ullensvang	100000	1150000
		Sogndal	100000
		Voss	100000
		Bergen	150000
		Øygarden	200000
		Modalen	50000
		Osterøy	150000
Vestfold	75000	Tønsberg	150000	375000
		Horten	150000
Østfold	200000	Fredrikstad	150000	350000