Otternes-tunet blir freda

Otternes bygdetun i Aurland blir torsdag 15. mai formelt freda av Riksantikvaren.  

Klyngjetunet ligg mellom Aurlandsvangen og Flåm, med utsikt over Aurlandsfjorden. Dei eldste bygningane er frå 1700-talet.  

– Otternes-tunet er ein fantastisk plass og eit godt døme på kva som gjer Noreg til Noreg. Her får me oppleva ein del av den vestlandske gardshistoria, som har vore med på å forma oss som samfunn i dag. Dette er det viktig å ta vare på, og eg er veldig glad for at eitt av Noregs siste gjenverande klyngjetun no blir freda, seier klima- og miljøminister Andreas Bjelland Eriksen.  

Eit sjeldan klyngjetun  

Tunet består av totalt 26 bygningar, og fredinga omfattar alle desse – og dessutan frukthagane. I tillegg blir innmarka rundt tunet freda.  

Dei antikvariske og kulturhistoriske verdiane til Otternes-tunet har vore omtalte heilt sidan 1920-talet, og allereie på 70-talet vart freding diskutert.  

– Otternes-tunet er ein stad med viktig kulturhistorie. Ikkje berre lokalt eller regionalt, men også i ein nasjonal samanheng. Dette er eit unikt døme på klyngjetuna på Vestlandet som fortener å bli teke vare på, seier assisterande riksantikvar Audun Skeidsvoll.   

Eit klyngjetun er ei tettbygd samling av gardsbruk, som tidlegare var vanleg på Vestlandet. Formålet med fredinga er å sikra og bevara Otternes, som eit kulturhistorisk og bygningshistorisk viktig døme på desse klyngjetuna.  

– Mange tenkjer at kulturminne handlar om ting, men det handlar om menneske og den felles historia og tilhøyrselen vår. Otternes-tunet har som freda kulturminne verdi for heile Noreg, seier Skeidsvoll.  

– Ei hyllest til kvardagsmenneska  

Det er Stiftinga Otternes bygdetun som i dag eig og driftar staden, og held det ope for publikum. 

– Fredinga av Otternestunet er ein hyllest til kvardagsmenneska – til dei mange gardbrukarane som ein gong utgjorde fleirtalet i Vestland, og til korleis liva deira har forma landskap og bygningar. Fylkeskommunen er glad for fredingsvedtaket, seier fylkesordførar i Vestland, Jon Askeland.  

– Stiftinga Otternes bygdetun har gjort eit svært godt arbeid med å setje i stand bygningane og ta vare på hagane. Vi har hatt eit godt samarbeid med stiftinga og ser fram til å halde fram med dette. Eg vil òg takke heile Aurland-samfunnet og Aurland kommune for engasjementet og viljen deira til å ta vare på den felles kulturarven vår, seier Askeland.