Rekordmange milliardar til innovasjon i 2024

I dag vert Innovasjon Noreg si årsrapport for 2024 publisert. I fjor bidrog Innovasjon Noreg med over 10 milliardar kroner i finansiering av innovasjonsprosjekt. Desse prosjekta vart i tillegg finansierte med ytterlegare 18 milliardar kroner frå private og andre kjelder. Totalt vart 29 milliardar kroner brukte på innovasjonsprosjekt der Innovasjon Noreg var involvert. Berre under koronapandemien har talet vore høgare.

– I 2024 fekk Innovasjon Noreg større økonomiske musklar. Gjennom nye låneordningar fekk vi betre moglegheiter til å finansiere fleire store industriprosjekt, samstundes som vi heldt fram med å støtte små og mellomstore bedrifter i deira innovasjonsarbeid, seier administrerande direktør i Innovasjon Noreg, Håkon Haugli.

Haugli meiner at ei verd i endring, med usikre marknader, gjer at aktørar som Innovasjon Noreg blir ekstra viktige.

– Verda rundt oss har endra seg dei siste åra, og norsk næringsliv må tilpasse seg ei ny røynd. Det har vi sett tydeleg dei siste dagane og vekene. Midt i denne usikkerheita har Innovasjon Noreg samarbeidd godt med over ti tusen bedrifter frå heile landet. Vi har støtta dei på vegen mot vekst og lønsemd, både heime og ute i verda.

Matcha av anna finansiering

Ein av dei viktigaste grunnane til at Innovasjon Noreg finst, er å redusere risikoen for andre finansieringskjelder. I 2024 vart kvar krone frå Innovasjon Noreg matcha med 1,7 kroner frå andre aktørar, hovudsakleg private. Dette er ein auke frå 2023.

– Det er gledeleg at dette talet har auka frå året før. Jo høgare tal, desto betre tilgang på kapital for norsk innovasjon. I tillegg bidreg vi òg til andre innovasjons- og internasjonaliseringsaktivitetar gjennom kurs og nettverksbygging, seier Haugli.

Verktøya verkar

Undersøkingar viser at kundar av Innovasjon Noreg veks meir og skårar høgare på både verdiskaping og produktivitet enn tilsvarande bedrifter.

– Tala viser tydeleg at våre finansielle bidrag har stor betydning, seier Haugli.

– Bedrifter som får finansiering frå Innovasjon Noreg har ein årleg mervekst i salgsinntekter og omsetning på 15,8 prosentpoeng. For verdiskaping og produktivitet er tala òg positive, med høvesvis 10,6 og 6 prosentpoeng, fortel Haugli.

Også gründerar som får støtte frå Innovasjon Noreg gjer det betre og veks raskare samanlikna med bedrifter som ikkje får slik finansiering.

Last ned heile årsrapporten her.