Vil forby ein av dei mest skadelege framande krabbane i verda

– Kinaullhåndskrabben er ein framand art som står på terskelen til å kunne etablere seg i Noreg. Den kan gjere stor skade, særleg på livet i elvane. Derfor foreslår vi no å forby all import av levande eksemplar av krabben, som kan vere attraktiv mellom anna for ein del restaurantar, seier direktør for Miljødirektoratet, Hilde Singsaas.

Grev ut elvebredder og er altetande

Kinaullhåndskrabben blir rangert på 34. plass blant dei 100 verste framande artane i verda, av Verdens naturvernunion (IUCN). Den forårsakar erosjon på grunn av den intensive gravinga si langs elvebredder, og kostar ifølgje IUCN fiskeri og akvakultur fleire hundre tusen dollar årleg på verdsbasis. Den norske Artsdatabanken vurderer kinaullhåndskrabben til å utgjere svært høg risiko. Den har stort invasjonspotensial, og kan gi lokale artar konkurranse om maten ved å ete store delar av botndyra. Den kan overleve vinteren utandørs.

Gjorde større beslag på Svinesund

I 2023 gjorde tollstyresmaktene eit beslag av levande kinaullhåndskrabber og andre krabbar på Svinesund. Slik import har ikkje tidlegare vore kjend. På oppdrag frå Miljødirektoratet laga derfor Vitskapskomiteen for mat og miljø (VKM) ein rapport, der dei vurderte miljørisikoen ved import av levande krabbar. VKM konkluderte med at kinaullhåndskrabben og fleire av dei andre krabbane har eit stort potensial for å etablere seg i sjøen og i ferskvatn i Noreg. I Sverige har kinaullhåndskrabben klart å etablere seg både langs kysten og i dei store innsjøane Mälaren og Vänern. Der har han hatt negative effektar på andre artar.

– Vi fryktar at import av levande kinaullhåndskrabbe kan føre til at arten spreier seg ut i norsk natur, og etablerer seg som ein konstant trussel mot artsmangfaldet i elvane våre, seier miljødirektør Hilde Singsaas.

Forslag om forbod sendt ut på høyring

Miljødirektoratet har no sendt eit forslag til endring av forskrift om framande organismar ut på høyring, som inneber forbod mot innførsel, omsetning og utsetjing av levande kinaullhåndskrabbe og seks andre skadelege framande krabbeartar.

Forslaget inneheld også ei rekkje andre endringar i forskrifta, som vil gjere den til eit betre verktøy for å forhindre at nye framande skadelege artar får etablere seg i norsk natur.