Statens vegvesen sikrar tunnelar på rv. 13 i Ryfylke

Jobben på den 85 kilometer lange strekninga i Hjelmeland og Suldal kommunar startar førstkomande måndag, 3. mars, og er planlagt å vera ferdig innan utgangen av mai.

– Det vi heilt konkret skal gjera, er å sikra og bolta fjellet i tunnelmunningane. Behovet for å gjera dette kom fram i geologisk hovudinspeksjon som vi hadde nyleg, seier byggeleiar Bjørn Brekke i Statens vegvesen.

Dette er ein del av vårt ordinære inspeksjonsregime, og det er viktig å understreka at tunnelane er heilt trygge. Dette bidreg til å gjera dei endå tryggare, legg han til.

Slik påverkar arbeidet trafikantane

Arbeidet finn stad måndagar klokka 09.00-19.00, tysdagar og onsdagar klokka 07.00-19.00 og torsdagar klokka 07.00-12.00.

Vegen blir stengd inntil ein time om gongen, og det blir gjennomkøyring med ledebil.

Naudetatar og buss i rute vil bli slopne gjennom.

– Derfor gjer vi dette

Statens vegvesen har forståing for at vegarbeid med stenging som dette kan vera krevjande for trafikantane.

– Men då er det viktig å understreka at vi gjer denne jobben nettopp for dei. Statens vegvesen sitt samfunnsoppdrag er å syta for at vegane skal vera trygge og framkomelege, og gjennom vårt inspeksjonsregime avdekker vi tiltak som er naudsynte å gjera for at vegen ikkje berre skal vera trygg i dag, men også i morgon. Det er det drift og vedlikehald av vegnettet handlar om, og sikring av tunnelar er ein viktig del av dette, legg Brekke til.

Og understrekar at Statens vegvesen gjer alt som er mogeleg for å minimera ulempene for trafikantene.

– Difor er det korte arbeidsveker, og ikkje arbeid i helgene då det har mykje trafikk til og frå fritidseigedomar i dette populære og flotte friluftsområdet, avsluttar byggeleiaren.

Arbeidet blir varsla i appen Vegvesen trafikk, på 175.no og langs vegen.