Naudsynt med nattestenging på E16 Åsbrekkegjelet-Skromle bru

Dette finn stad i veke 9-11, frå og med natt til 24. februar til og med 13. mars.

Arbeida startar sundag kveld, med fysisk stenging av vegen ved midnatt.

Slik vert stengjetidene

Trafikkreguleringa vert som fylgjer:

¤ Stengd klokka 00.00-03.00  

¤ Sleppa gjennom trafikk 03.00-03.15

¤ Stengd klokka 03.15-06.00

Stenginga finn stad natt til måndag, tysdag og onsdag og torsdag dei aktuelle vekene.

– Etter tre veker med stenging på natt, går me tilbake til arbeid utelukkande på dagtid, med stenging éin time, frå klokka 12.15-13.15, seier byggjeleiar Vegard Klette i Statens vegvesen.

Det er ingen lokale omkjøringsalternativ medan vegen er stengd.

– Me har forståing for at dette er krevjande for trafikantane, men på grunn av tryggleiken for alle må me stengja vegen medan me sprengjer. For å minimera ulempene for trafikantane, har me difor valt å leggja  arbeidet til den på døgnet då et det er minst trafikk. Og me har avgrensa jobben til fire netter i veka, understrekar byggjeleiaren.

Det vil framleis vera anleggsarbeid på dagtid. Dette gir redusert fartsgrense til 50 km/t der det føregår arbeid, og 70 km/t der det ikkje vert jobba.

– Ta omsyn til dei nedsette fartsgrensene. Dei er sette slik for å vareta tryggleiken også for dei som gjer vegarbeid. Overalt kor det er vegarbeid, må farten settast ned i tråd med regelverket.

Dette er prosjektet

Anleggsarbeida på den tre kilometer lange E16-strekning vil føregå fram til oktober 2026.

– Statens vegvesen skal etablera gul midtstripe og kvit kantstripe, slik vi tidlegare har gjort på Tvinno-Løno. Me held dermed fram med å forbetra E16 gjennom Voss herad, til glede for alle trafikantar, seier Klette.

Åsbrekkegjelet-Skromle bru er i dag smal og har dårleg sikt. Første fase i arbeidet er å sprengja i terrenget, slik at vi kan breiddeutvida vegen slik at han oppfyller krava til forsterka midt- og kantoppmerking, avsluttar Klette.

Strekninga Åsbrekkegjelet-Skromle vert gjennomsnittleg trafikkert av 4127 køyretøy dagleg. Det er dette som heiter årsdøgntrafikk (ÅDT). Av dette er 17 prosent, eller 701, lange køyretøy (tungtrafikk).

Dokka Entreprenør AS er entreprenør på prosjektet, som har ein kontraktssum på 117 millionar pluss moms.