Kanadalaš supernásti boahtá Olmmáivággái

Tagaq lea Ikaluktutiakas Nunavutas eret ja lea eallenagi leamašan duostil ja duohta biras-, eamiálbmot- ja olmmošvuoigatvuođaid áŋgirušši, ja su mielas lea dehálaš fuomášuhttit post-koloniála hástalusaid.   

Musihkastis seaguha Tagaq čottalávluma savkkuhemiin, punkain, metalain ja elektronikain, ja ráhkada musihkalaš hámi mii ii muittut maidege eará. Musihkka lea suokkardeapmi dáiddalaš árbevieruin mat leat logi duháhiid jagiid boarrásat, seammás go das lea hyperođđaáigásaš hápmi.    

Lassin leat dovddus musihkar ja eamiálbmotaktivista lea Tagaq maiddái čállán girjjiid mat lea hui bures johtán ja maiguin lea bálkkašumiid fasken.  

Tanya Tagaq lea Order of Canada-lahttu ja lea ožžon JUNO-bálkkašumi, Polaris Music Prize ja lea moanat geardde beassan gudnedoavttirin, ja lea okta Kanada eanemus erenoamáš ja dovddus artisttain.  

Olmmáivággái boahtá Tagaq perkušunisttain Jean Martiniin ja celločuojaheddjiin Jeffrey Zeigleriin.   

Festiválajođiheaddji Sajje Solbakk muitala: 

-Mii leat mearehis čeavlát ja movttegat go sáhttit fállat Riddu-movtta juo njukčamánus, go Tanya Tagaq viimmat máhccá Olmmáivággái! Midjiide Riddu Riđđus lea hirbmat dehálaš sáhttit fállat kultuvrralaš lágidemiid Gáivuonas maiddái dálvveáigge, ja danin leat mii nu rámis go sáhttit fállat konseartta jur Tanya Tagaqiin, albma liekkadeapmin ovdal festivála.  

Tagaq lea ovdal galledan Riddu Riđđu ja Olmmáivákki, maŋemus háve jagis 2019.