Camp Akkasæter veks fram – ferdigstilling i sikte for 2026

Forsvaret og Forsvarsbygg markerte bruken av to nye forlegningar og eit teknisk bygg i eit vêr Akkasæter i Blåtind/Målselv også kan levere. Vindstille og sol på fjella!

Høg aktivitet av allierte som øver og trenar

Aktiviteten på leiren har auka betrakteleg det siste året, mellom anna grunna høgt nærvær av tyske styrkar under vinterøvinga Nordic Response i 2024. For å handtere dette, er det etablert både mellombelse og permanente teltløysingar, inkludert seks forlegningstelt, eit sanitærtelt, eit messetelt og eit lager. Samtidig har arbeidet med fleire permanente bygg komme langt.

Tilrettelegging for heilårs bruk

-Det blir bygd forsvarsevne kvar dag. I Akkasæter er  det lagt til rette for at det blir øvd, trena og at militært personell bur på ein svært tilfredsstillande måte, seier Jørn Myrlund, prosjektsjef i Forsvarsbygg.

Infrastrukturen er på plass, og det inkluderer vegar, plassar, vass- og avløpssystem, og dessutan eit omfattande fjernvarmeanlegg med titals energibrønnar. Vassforsyninga er sikra for brannvern, og avløpssystemet vil bli kopla til eit reinseanlegg som er forventa ferdigstilt til sommaren.

Vidare utbygging er allereie på gang

Dei neste fasane på Akkasæter omfattar fleire store delprosjekt. Det tredje forlegningsbygget skal etter planen ferdigstillast i løpet av 2025 med ein kapasitet på 170 personar.

-Forventninga er at heile Camp Akkasæter står ferdig innan sommaren 2026. Klar til å møte framtidas behov for både nasjonale og internasjonale styrkar, seier Jørn Myrlund.

Entreprenørar har vore Skanska Husfabrikken AS, Peab Bygg AS og Målselv Maskin AS.

Akkasæter-modellen viser veg for framtidas forsvarsutbygging

Sjef for Hærstaben, brigadar Trond Nilsen, fortalde at «Akkasæter-modellen» er no eit omgrep i Forsvarets langtidsproposisjon. Modellen er basert på ein enkel, men funksjonell standard. Fleirbruksløysingar i staden for skreddarsaum, og eit redusert tal bygg med fleire funksjonar.

-Akkasæter har vorte eit symbol på kva godt samarbeid og effektiv gjennomføring kan oppnå. Dette gir grunnlag for standardiserte løysingar som kan etablerast i heile landet. I tett samarbeid med Forsvarsbygg har Hæren utvikla eit prosjekt som ikkje berre leverer gode løysingar, men som også viser veg for framtidige anskaffingar, sa brigaderen.

Effektiv gjennomføring og stor interesse for Akkasæter-prosjektet

Brigader Nilsen fortalde at det blir planlagt totalt for 12 000 sengeplassar i nord og 7 000 i sør. Den gode infrastrukturen ved Akkasæter styrkjer Noregs posisjon som ein attraktiv vertsnasjon for internasjonale styrkar.

-Forsvarsbygg har gjennom prosjektet vist framifrå leiing og samarbeidsevne, og ver stolte av innsatsen de har lagt ned. De byggjer ikkje berre infrastruktur – de styrkjer forsvaret og byggjer forsvarsevne kvar einaste dag, understreka Nilsen.

Samarbeid og tilrettelegging viktig

Sjef for Alliert treningssenter, ATS, Frank Aarbog, trekte fram at Camp Akkasæter er ein del av det operative planverket, og viktig for beredskapen. Dette er i tråd med Langtidsplanen for sektoren og skal brukast av både allierte og Forsvaret.

Ordførar i Målselv Martin Nymo framheva at det var ein stor dag og ein milepæl at det no står permanente bygg i leiren på Akkasæter. 
- Vi har eit kjedeleg bakteppe med krig i Europa, og då er det imponerande å sjå at Camp Akkasæter har utvikla seg raskt og i godt samarbeid med Forsvarsbygg og Forsvaret.