Skatteetaten åtvarar: Mange forsøk på svindel når skattekorta blir gjorde tilgjengeleg

 – Skatteetaten sender aldri lenkjer uoppmoda i e-postar eller SMS, seier Skatteetatens tryggingsdirektør Ragna Fossen.  

Logg alltid inn via skatteetaten.no eller altinn.no 

– Det beste vernet mot svindel er at du sjølv går til skatteetaten.no eller altinn.no og loggar på der. All vår elektroniske kommunikasjon med skattytarar som omfattar sensitive opplysningar skjer innlogga via skatteetaten.no og altinn.no, seier Fossen.  

Skattekortet kjem 16. desember 

Den 16. desember vil det komme meldingar til alle med inntekt eller formue om at skattekortet er klart og bør sjekkast. Du må her, som alltid når vi sender ut meldingar, gå til skattetaten.no eller altinn.no og logge deg på for å sjekke at opplysningane vi har om deg og formuen og inntekta di stemmer. 

Skatteetaten ser alvorleg på slike svindelforsøk og politimelder jamleg. 

Dette må du gjere om du har fått forsøk på e-post-svindel: 

• Ikkje oppgi noko av informasjonen det blir beden om, eller svar på sms eller e-post som du er usikker på. Trykk ikkje på lenkjer eller vedlegg, men slett e-posten.  

• Om du har gitt kort- og kodeopplysningar som vart etterspurde frå ein slik falsk e-post, ta kontakt med banken og sperr kort og kontoar så raskt som mogleg. 

• Send gjerne vidare mistenkjelege SMS eller e-postar til phishing@skatteetaten.no. Det gir oss moglegheit for å oppdage nye variantar raskare. 

• Ta også gjerne kontakt med politiet. Her kan du få råd om kva du bør gjere vidare.   

Her kan du sjå fleire tips for å unngå svindel og døme på falske meldingar som gir seg ut for å vere frå Skatteetaten: https://www.skatteetaten.no/om-skatteetaten/sikkerhet/svindel/