Ny redaktør i NRK Nyheiter

I dag fekk dei tilsette nyheita om at Ole Eivind Henden (51) får jobben som ny redaktør i Nyheitsdivisjonen i NRK. Dette kunngjorde konstituert nyheitsdirektør Marius Tetlie på eit allmøte fredag. Henden erstattar Knut Magnus Berge, som etter eige ønske går tilbake til jobben som journalist.

— Ole Eivind har tung publisistisk kompetanse og tek kloke avgjerder i etisk krevjande saker. Han er strategisk og dyktig på å bygge laget. Dette er eigenskapar som er viktige når han skal bidra til å vidareutvikle nyheitsjournalistikken i ei tid der endringane skjer i høgt tempo. Vi gler oss til han begynner i jobben som redaktør, seier Tetlie.

Brei erfaring 

Henden har vore tilsett i 26 år i NRK. Han har arbeidd som nyheitsreporter og hatt ei rekke leiarjobbar, mellom anna i Dagsrevyen. Henden kjem frå stillinga som redaksjonssjef i innlandsredaksjonen og har tidlegare også vikariert som redaktør i Nyheitsdivisjonen.

— Eg ser verkeleg fram til å jobbe saman med ein fantastisk dyktig gjeng for å utvikle NRKs nyheitstilbod vidare. Det er eit privilegium å få ta eit leiaransvar for noko av det viktigaste NRK har å tilby det norske folket: nyheiter, innsikt og debatt, seier Ole Eivind Henden.

Henden går inn i redaktørkollegiet i NRK Nyheiter saman med nyhetsdirektøren og redaktørane for fag- og direktelinja.