Når elevar brukar nettbrett, jobber dei meir åleine

– I læringssituasjonar der elevar på første trinn brukar nettbrett i klasserommet, skjer det vi kan kalla ei individualisering i korleis elevane jobbar. Dette betyr at elevane arbeider i stor grad åleine med læringsoppgåver. Dette gir mindre rom for viktige sosiale læringsarenaer, seier Liv Kristin Bjørlykke Øvereng.

Ho har forska på interaksjon mellom lærar og elevar i digitale førsteklasserom. Ho har undersøkt korleis det som skjer i klasserommet er påverka av bruk av nettbrett, og korleis nettbrett vert brukt i begynnaropplæringa i skulen.

Studien er ein del av DigiHand-prosjektet, som har vore eit samarbeid mellom Høgskulen i Volda (HVO) og Nasjonalt lesesenter, Universitetet i Stavanger (UiS).

Nettbrett kan vere sosialt

Nettbrettet treng ikkje berre brukast når elevane arbeider åleine, påpeiker Øvereng.

– Det finst mange moglegheiter for at elevane kan vere engasjerte i sosiale læringssituasjonar når dei bruker nettbrett, men studien tyder på at dette ikkje er nytta i særleg grad, forklarar Øvereng. 

Sosiale læringssituasjonar handlar om at elevane jobbar saman i grupper, par eller heile klassen for å lære. Dei kan for eksempel diskutere eller samarbeide om oppgåver.

Øvereng peikar på at lærarane i studien legg til rette for god læring på mange måtar.

– Dei gir god emosjonell støtte og har god klasseromsorganisering. Dei viser også eit læringsorientert perspektiv på elevane si læring med nettbrett. Dei legg til rette for at elevane skal lære funksjonar i nettbrettet som kan bidra i læringa. 

– Vi ser likevel at med bruk av nettbrett, kan kvaliteten i interaksjonane vere svekka, noko som kan bidra til å svekke ein kjerneverdi i god undervisning.

Oppfordrar til meir samhandling

Ho oppfordrar lærarar til å ikkje berre fokusere på dei tekniske aspekta ved nettbretta, men også å legge til rette for meir samhandling både mellom elevane, og mellom lærar og elevar. 

– I skulen i dag er det ein grunnleggande tanke om at samhandling er eit viktig grunnlag for elevane si læring og utvikling. Og i skulen er det organisert slik at elevane kan samhandle både gjennom par, i grupper og i stasjonsarbeid. Likevel så vart ikkje dette potensialet med til dømes stasjonsarbeid brukt til samhandling, elevane sat likevel og jobba individuelt sjølv om dei var på ein stasjon. Dette potensialet ligg der og er lett tilgjengeleg for å brukast, også med bruk av nettbrett.