NVE tilrår nye vilkår for vasskraft-reguleringa av Aurdalsfjorden

Konsesjonen til å regulere Aurdalsfjorden vart gitt i 1958 til Foreningen til Bægnavassdragets Regulering (FBR). Etter krav frå kommunane Nord-Aurdal og Sør-Aurdal, har NVE gjennomført ein revisjon av konsesjonsvilkåra. Målet er å oppdatere vilkåra slik at dei er i tråd med dagens kunnskap om miljøpåverknad.

Nye krav sikrar minstevassføring og sommarvasstand 

Konsesjonen frå 1958 påla eit slepp frå Bagn kraftverk som ikkje skulle minske naturleg lågvassføring i Begna. I dag slepp konsesjonær frivillig ei høgare minstevassføring frå kraftverket.  

– Erfaringane med reguleringa viser at denne minstevassføringa har vore tilstrekkeleg til å halde oppe livsmiljøet i og langs vassdraget. Vi anbefaler at minstevassføringa vert vilkårsfesta, seier Brit T. Haugen, fungerande seksjonssjef i NVE.  

Det er også i dag ein skjønnspålagd sommarvasstand i Aurdalsfjorden, men det har ikkje vore krav til når sommarvasstanden skal vere nådd. Av omsyn til landskapsoppleving og friluftsliv, tilrår NVE å fastsetje sommarvasstanden for perioden juni til oktober.  

Nye krav vil ikkje påverke kraftsystemet  

Bagn kraftverk, som har inntak i Aurdalsfjorden, produserer om lag 340 GWh (gigawattimar) i året. Reguleringa har lita lagringsevne, og heng tett saman med reguleringar oppstraums. NVE har vurdert konsekvensane av andre krav som er fremja. Det gjeld mellom anna strengare restriksjonar på vassføringsendringar og minstevassføring frå dammen, av omsyn til blant anna biologisk mangfald. Krava ville hatt så stor påverking på kraftsystemet at NVE ikkje tilrår å innføre dei.   

– I denne regionen er det høgt forbruk, men liten produksjonskapasitet og få vassmagasin. Derfor er det viktig å bevare både kraftproduksjon, lagringskapasitet i magasin og evne til å levere systemtenester. Dette omsynet har vege tungt i vår vurdering av krava, seier Haugen.  

NVE meiner at vassføringsendringane som følgjer av reguleringa ikkje er ein vesentleg  ulempe for aure- og elvemuslingbestandane i Begna. Dei nye standardvilkåra vil gi styresmaktene høve til å påleggje FBR å gjennomføre undersøkingar i vassdraget. Det gjer også høve til å påleggje mildnande tiltak som kan betre forholda for bestandane.   

Vidare saksgang  

No når NVE har sendt si innstilling til Energidepartementet (ED), vil departementet sluttbehandle sakane. Dersom nokon av partane har ny informasjon eller merknadar til innstillinga, kan dei sendast til ED på postmottak@ed.dep.no, innan 21. januar 2025. ED har tilgang på alle tidlegare dokument i saka, slik at det berre er nye høve eller vurderingar som bør sendast inn.