Nytt næringsstoff og nye matvarer i Matvaretabellen

- I årets versjon av Matvaretabellen har vi lagt til fritt sukker som nytt næringsstoff, fortel seniorrådgjevar i Mattilsynet, Jorån Østerholt Dalane. Dette gjer at brukarane av Matvaretabellen enkelt kan finne informasjon om innhaldet av fritt sukker for dei fleste matvarene i tabellen.  

Fritt sukker omfattar tilsett sukker og sukkerartar som naturleg førekjem i honning, sirup, fruktjuice og fruktjuicekonsentrat. Fritt sukker blei inkludert i dei nye nordiske næringsstoffanbefalingane (NNR2023) og Helsedirektoratets referanseverdiar for energi og næringsstoff i 2023.  

Ved å gjere data om fritt sukker tilgjengeleg i Matvaretabellen, vil det kunne bidra til meir kunnskap om innhaldet av fritt sukker i matvarer. Det er forskarar ved avdeling for ernæringsvitskap ved Universitetet i Oslo som har framskaffa verdiane for fritt sukker i eit prosjekt finansiert av direktør Throne Holsts stiftelse. 

Nye næringsstoffverdiar for grønsaker og skaldyr 

Vi har oppdaterte næringsstoffverdiar for grønsaker som gulrot, tomat, lauk, blomkål, brokkoli og hovudkål. Dette er viktige matvarer i det norske kosthaldet, og dei oppdaterte verdiane vil difor kunne vere nyttig både for forbrukarar og fagpersonar i vurdering av inntak av næringsstoff som kostfiber, vitamin og mineral.  

Nye næringsstoffverdiar for krabbe, kamskjel, hummar, blåskjel og kreps er òg med i den nye versjonen av Matvaretabellen. Desse kjem frå analysar gjennomført av Havforskningsinstituttet.  

I tillegg har vi utvida utvalet av glutenfrie produkt og belgfrukter, og lagt til matvarer som næringsgjær, fullkornsnudlar, gresk yoghurt og fleire typar heimelaga pizza, fortel Dalane. 

Den norske Matvaretabellen er ein matvaredatabase som viser energi og næringsinnhald i matvarer. Tabellen er eit viktig oppslagsverk og reiskap i matforvaltning og ernæringspolitikk, i undervisning og opplysningsarbeid og for helsepersonell og forskarar.  

Matvaretabellen kan òg brukast av næringsmiddelindustrien som grunnlag for næringsdeklarasjonar og ved matproduksjon.  

Les meir om Matvaretabellen: Matvaretabellen | Mattilsynet