Lansering av Fosseforedraget og Fosseprisen for omsetjarar 2025: Offentleggjering av foredragshaldar og prisvinnar på Nasjonalbiblioteket 25. november kl. 11.00

I desember 2023 blei det kjent at regjeringa, som ei heidring av nobelprisvinnar i litteratur Jon Fosse, vil leggje til rette for eit årleg Fosseforedrag og ein Fossepris for omsetjarar. Arrangementet er i regi av Nasjonalbiblioteket, og foredraget vil bli halde av ein internasjonal akademikar, forfattar, dramatikar eller annan tenkjar, medan prisen skal gå til ein omsetjar som omset frå norsk til eit anna språk.

– Med dette initiativet vil vi skape ein kulturell møteplass som inspirerer til samtale om litteratur både i Noreg og internasjonalt. Vi vil vise fram den krafta og rolla litteraturen har i samfunnet, og bidra til å plassere Noreg endå tydelegare på det internasjonale litteraturkartet, seier kultur- og likestillingsminister Lubna Jaffery.

– Formålet med Fosseforedraget er å bringe den internasjonale tenkinga rundt litteratur til Noreg, og målet med Fosseprisen å heidre dei som bringar norsk litteratur til resten av verda. Med dette skaper vi nye institusjonar i Noreg – institusjonar som skal vare i generasjonar framover, seier Nasjonalbibliotekar Aslak Sira Myhre.

Foredraget
Fosseforedraget skal framheve originale perspektiv på litteraturen og stimulere den offentlege litteratursamtalen både i Noreg og ute i verda. Foredragshaldaren er ikkje beden om å snakke om Fosse og treng ikkje å kjenne til forfattarskapen til Jon Fosse på førehand eller referere til Jon Fosse under foredraget. Det er samtalen og tenkinga om litteraturen i seg sjølv som skal løftast, i tråd med ånda og verksemda til Jon Fosse.

Fosseforedraget skal vere originalt og skrive for høvet.

Ein av dei største omsetjarprisane i verda
Under same arrangement skal Nasjonalbiblioteket i samarbeid med NORLA (Norwegian Literature Abroad) dele ut Fosseprisen for omsetjarar. Prisen skal hylle ein person som over tid har arbeidd med å omsetje norsk litteratur til andre språk.

Fosseprisen for omsetjarar skal bidra til å heidre omsetjarkunsten og understreke den viktige rolla omsetjarane har når det gjeld å bringe norsk litteratur ut i verda. Fosseprisen blir ein av dei største omsetjarprisane i verda, med ein verdi på 500 000 norske kroner.

Ny internasjonal kulturhending
Rundt Fosseforedraget og -prisen vil Nasjonalbiblioteket byggje eit arrangementsprogram som opnar fleire vegar inn i litteratur- og dramatikkdebatten for eit breitt publikum. NORLA skal dessutan arrangere eit internasjonalt omsetjarseminar i samband med prisutdelinga.

– Slik vil Fosseforedraget og Fosseprisen for omsetjarar bli ei ny internasjonal kulturhending i Noreg der litteraturen og dramatikken blir feira og diskutert, seier Aslak Sira Myhre.

Vi legg til rette for foto og intervju. Meld deg på til presse@nb.no seinast 20. november kl. 12.

Enkel servering ved Credo.

Framlegginga blir strøymd. Påmeldt presse som vil delta digitalt vil få lenke til strøyminga.