Storkontrakt til Eviny Solutions

Kontrakten betyr at Eviny Solutions skal levere tenester som gjeld drift, vedlikehald, beredskap samt fornyings- og nybyggingstenester i straumnettet i heile Linjas forsyningsområde. Eit område som består av 19 kommunar i Møre og Romsdal og 7 kommunar i Vestland Fylke.

Linja er særs nøgd med at vi etter gjennomført konkurranse har inngått kontrakt med Eviny Solutions som vår el-entreprenør for komande periode, seier Arve Hovdenak, divisjonssjef for nettforvaltning i Linja.

Vi har mange spennande oppdrag som skal løysast framover, og vi har gode erfaringar med bruk av entreprenørar som supplement til eigen kapasitet, seier Hovdenak. 

Han legg til at Eviny Solutions gjennom tidlegare samarbeid har vist at dei har medarbeidarar med god kompetanse som utfører arbeid med høg kvalitet.

Tenestene frå Eviny Solutions skal bidra til at Linja løyser sitt viktige samfunnsoppdrag. Det vil seie god forsyningstryggleik til 170 000 innbyggarar, elektrifisering av Nordvestlandet og leveranse av kraft som legg grunnlaget for den elektriske framtida.

Vi ser avtalen som ei stor tillitserklæring, seier Helge Rysjedal, dagleg leiar i Eviny Solutions.

At Linja tildeler oss heile arbeidsomfanget i alle dei tre geografiske sonene er ei stadfesting av vår kompetanse og dokumenterte evne til å sikre kvalitet i leveransane. Vi vann kontrakten i sterk konkurranse fordi vi har eit dyktig fagmiljø, seier Rysjedal.

Noverande avtale blir avslutta ved årsskiftet. Den har vore delt mellom Eviny Solutions og eit anna entreprenørselskap.

Vi meiner vi vil kunne levere betre tenester til Linja når vi no har ansvaret for alle tenestene i heile området, seier Wenche Fjørtoft, leiar for Region Nord i Eviny Solutions.

No skal vi vise oss tilliten verdig og det gler vi oss til, avsluttar Fjørtoft.

Avtalen går over to år med opsjonar på å forlenge på 1+1+1+1 år, altså inntil seks år totalt.