NVE gir lovbrotsgebyr til Østfold Energi AS

– NVE meiner at hendinga i november i fjor er eit alvorleg brot på manøvreringsreglementet, og at skadepotensialet er stort. Det er skjerpande at Lærdalselva er eit nasjonalt laksevassdrag, og at Østfold Energi AS er kjende med dette, seier Mari Hegg Gundersen, seksjonssjef for miljøtilsyn i NVE.

Østfold Energi AS eig og driftar Borgund kraftverk som nyttar vatn frå fleire reguleringsmagasin. Kraftstasjonen ligg i fjell, og derifrå går driftsvatnet ut i Lærdalselva.

Etter at det eine aggregatet i kraftstasjonen hadde utfall i november 2023, førte ein prosedyrefeil ved igangsetting av aggregatet til at begge aggregata stogga. Dette førte til at det ikkje var mogeleg å sleppe nok vatn (12 m3/sek) forbi kraftstasjonen, slik det er sett krav om i manøvreringsreglementet. Konsekvensen var at vasstanden i Lærdalselva gjekk hurtig ned i løpet av kort tid.

Hurtig nedgang i vasstand kan føre til stranding av fisk

– Hurtig nedgang i vasstand på kort tid fører til tørrlegging av sandbankar i elva og dette kan igjen føre til at fisk strandar. Lærdalselva er eit nasjonalt laksevassdrag der laksen skal ha eit særskilt vern, seier Hegg Gundersen.

NVE meiner det er dokumentert at den bakanforliggande årsaka til hendinga er at rutinar og prosedyrerar for drifta av kraftanlegga ikkje er presise nok og dekkande for situasjonen som oppstod 29.november i fjor. NVE meiner dessutan at hendinga kunne ha vore unngått med tilstrekkeleg presise rutinar, og målretta opplæring av personell.

Østfold Energi AS kan klage på vedtaket til Energidepartementet innan tre veker etter at dei er kjende med vedtaket.