Fiskebåt: - CO2-forslag er næringsfientleg og svekkar norsk beredskap

Regjeringa foreslår i sitt forslag til statsbudsjett å innføre CO2-avgift på fiske i fjerne farvatn med 25 prosent av full sats. I tillegg er det foreslått å innføre CO2-avgift på utanriks sjøfart. Begge dele vil få negative følgjer for fiskeflåten, og då særleg for rekefisket lengst mot nord som er svært konkurranseutsett.

- Stortinget har tidlegare vore opptatt av å auke aktiviteten i rekefisket Barentshavet og Arktis. Dette er ein ressurs som ikkje er fullt ut utnytta. I tillegg sikrar det at norske interesser er til stades i nordområda, som er viktig tryggingspolitisk, og gir legitimitet til norsk råderett langt mot nord. No går regjeringa motsett veg, seier Maråk.

Han viser også til at fisk er klimavenleg mat med lave CO2-utslepp, og ein må sjå på totalen når det gjeld utslepp av klimagassar. Regjeringa sitt forslag vil innebere auka norske utslepp, fordi ein ikkje lenger kan bunkre avgiftsfritt ved norske bunkersanlegg.

- Norsk fiskeri opererer i ein internasjonal marknad, og det er difor viktig at avgiftssystemet er harmonisert med dei vi konkurrerer med. Endringane som regjeringa no foreslår i forhold til CO2-avgifter, vil svekke konkurranseevna vår, seier Maråk.

Han viser til at særnorske avgifter vil føre til at fiskeriaktiviteten blir redusert. Og at Norge blir mindre til stades i nordområda.

- Forslaget har også andre svært negative konsekvensar om det blir vedtatt. Flåten blir tvunge til å auke bunkringane i utanlandske hamner eller utafor 12 mila. Dette vil neste omgang redusere talet på bunkringsstasjonar langs norskekysten og svekke norsk beredskap ytterlegare, seier Maråk.