No kan du søke om kyrkjetilskot for 2025

– For 2025 trappar vi opp kyrkjebevaringsfondet med ei ny tilskotsordning for å sikre og bygge opp viktig handverkskompetanse. Vi treng fleire handtverkarar for å ta oppdraga som kjem, slik at dei kulturhistoriske verdifulle kyrkjebygga i by og bygd blir tatt vare på. Den nye handtverkssatsinga er i tråd med regjeringas bevaringsstrategi for kyrkjebygg, seier barne- og familieminister Kjersti Toppe.

Det er i alt fire tilskotsordningar som kyrkjene kan søke på for 2025. Det er to typar forprosjekt, hovudprosjekt og den nye kompetanseordninga.

• Overordna forprosjekt: ei oversikt over skadar, behov og manglar som gjeld kyrkjas eksteriør, interiør og inventar.
• Særskilde forprosjekt: eit forarbeid for konkrete istandsettings-, sikrings- og konserveringstiltak.
• Hovudprosjekt: eit byggjeprosjekt for å setje i stand, sikre eller konservere.  
• Kompetansetiltak: tiltak som skal byggje kompetanse og kunnskap for handtverkare og rådgjeverarar som til dømes kurs, formell utdanning eller opplæring på byggjeplassen.

Håpar på mange søknadar

Kyrkjebevaringsfondet starta opp i 2024, og fordelte nærare 100 millionar til 44 kyrkjer som ei start på tilskotsordninga. Ramma for 2025 vil bli lagt fram med statsbudsjettet for 2025 seinare i oktober. 

I den første runda med utlysing i 2024 var det 103 søknadar i alt. Frå Oslo og Nordland kom det ikkje inn nokon søknadar. 

No blir fleire kyrkjer oppmoda til å levere inn. 

– Sekretariatet i Trondheim er klare til å ta i mot enda fleire søknadar enn i førre runde, seier Oddbjørn Eide, leiar av kyrkjebevaringsfondet. 

– Eg håpe at mange vil søkje, og at fleire kyrkjer har fått tid til å planleggje prosjekta sine. Vi veit at det er mange kyrkjer som framleis er i startgropa av prosjekta sine. Venteleg kjem vi til å tildele tilskot i løpet av januar 2025.

Søk i Digisak

Tilskotsutlysingane ligg på Riksantikvaren sine nettsidar, og kyrkjene skal sende søknad i kulturmiljøforvaltninga sin søknadsportal Digisak. 

Søknadsfrist er 4. november.

Kyrkjebevaringsfondet er eigd av Barne- og familiedepartementet, som har utnemnd eit programstyre med medlemmar frå Den norske kirke, Hovedorganisasjonen KA og Riksantikvaren.

Riksantikvaren leiar programsekretariatet for fondet.