To Stavanger-forskarar til nasjonal finale i Oslo

Gudrun David Sigmo frå Universitetssjukehuset i Stavanger vann den regionale finalen i forskingsformidling (Forskar Grand Prix 2024) onsdag 25. september. 

Sasan Zarghooni-Hoffmann frå Universitetet i Stavanger kapra andreplassen. No reiser dei begge til Oslo for å delta i den store nasjonale finalen laurdag 28. september, som Forskingsrådet arrangerer. 

I alt var det 10 doktorgradskandidatar som konkurrerte på scena i storsalen på konsertscenen Folken framom 200 publikummarar og ein fagjury.

Kandidatane har førebudd seg i fleire månader på å formidle doktorgradsprosjekta sine på berre 4 minutt. På forskings-showet fekk dei poeng frå publikum og dommarar.

Menn med leddgikt er meir fruktbare enn andre menn

Gudrun David Sigmo er spesialist i revmatologi og indremedisin, og arbeider som overlege ved Stavanger universitetssjukehus. Ho tek doktorgraden sin ved Universitetet i Bergen.

Sigmo har forska på om leddgikt kan påvirke menns evne til å få barn. Ho vart overraska over funnet: Det viser seg at menn med leddgikt får fleire barn enn andre menn.

Sigmo presenterte forskinga si utan powerpoint, men begeistra alle og vann. No kan ho kalle seg Stavanger-regionens beste forskingsformidlar.

Vil auke nasjonal tryggleik 

Sasan Zarghooni-Hoffmann frå Universitetet i Stavanger presenterte si forsking om Tolletaten. Han oppdaga at styresmaktene, som for eksempel Justisdepartementet, har ein for smal forståing av Tolletaten si rolle innan beredskap og samfunnstryggleik. 

Zarghooni-Hoffmann viste mellom anna til at Tolletaten under pandemien bidrog sterkt til å hindre smittespreiing: Det første halvåret av pandemien blei det konfiskert 23 millionar juksemunnbind på grenseovergangar inn til Noreg.

– Du ville ikkje ha visst det var falskt dersom du fekk eit slikt munnbind. Å stoppe desse var kjempeviktig for folkehelsa, påpeiker Sasan Zarghooni-Hoffmann, som meiner at forskinga hans kan føre til auka nasjonal tryggleik.

Les om forskinga til Sasan Zarghooni-Hoffmann: Har avdekt manglar i styresmaktene sine beredskapsplanar.

Nasjonal finale i Oslo

Alle kan vere med på å stemme på den kandidaten dei meiner formidlar forskinga si best ved å registrere seg og delta digitalt på Den nasjonale finalen i Forskar Grand Prix. 

Showet strøymast også på forskning.no.

Gruppeklem-forskar sjarmerte dommarane

Doktorgradsstipendiat Øystein Nybøe var også med og kjempa om finalebillett. Han sjarmerte med si varme og engasjerte forteljing frå skulekvardagen. Hans forsking på interaksjonen mellom lærar og elevar, for eksempel gruppeklem, er eit viktig bidrag til å skape eit trygt og godt læringsmiljø for alle.

Dei andre deltakarane var: Ingrid Hilmer (UiS), Frida Layti (UiS), Veronika Lorentzen (UiS), Thomas Meldahl Olsen (UiS), Marte Pupe Støyva (UiS), Veronica Øverlid (VID Vitenskapelge høgskole) og Cecilie Aarøe (UiS).

Les meir om kva dei 10 deltakarane forskar på.

Sidan 2010

Forskar Grand Prix har vore arrangert sidan 2010. 

I 2024 blir regionale finalar halde i Kristiansand, Stavanger, Bergen, Tromsø, Bodø og Oslo. I den nasjonale finalen i Oslo kjempar dei regionale vinnarane om tittelen: Norges beste forskingsformidlar.

Forskar Grand Prix Stavanger 2024 er arrangert av Universitetet i Stavanger for Forskingsdagane i Stavanger-regionen. Camilla Larsen og Karen Anne Okstad har vore ansvarlege for arrangementet og Berit Aarrestad har trent kandidatane for sceneframføring.