Stengjer Låga gangbru i Suldal

Låga bru ligg ved riksveg 13 i Suldal, men blir i dag berre brukte av turgåarar og fiskarar som kryssar elva. Fordi brua er verna er ho framleis i Statens vegvesens eige.

– Utviklinga av tilstanden til dei berande elementa gjer det nødvendig å stengje brua inntil vidare. Risikonivået blir rekna som for høgt til at brua kan halde fram med å vere open for ferdsel, seier bruforvaltar Bengt Olav Skogland i Statens vegvesen.

Det er ikkje avklart kor lenge brua vil vere stengt eller kva slags utbetringar som vil vere nødvendige.

– Målet er å ta vare på brua, både som ein del av ein turveg og som kulturminne, seier Skogland.

Det er grunn til å tru at brua er bygd ein gong mellom 1780 og dei første tiåra av 1800-talet.